Забур 83 - Сыйлы Инжил бла Забур

¹ Хорну таматасына: гитит керек бла. Къорах улуланы зикирлери.

² Неге да кючю жетген Раббий, Сени мекямларынг къалай кюселедиле!

³ Раббийни арбазларын асыры кюсегенден, мени жаным онгсуз болгъанды; мени жюрегим да, мени чархым да жашау бериучю Аллахха къууанып зикир айтадыла.

⁴ Неге да кючю жетген Раббий, мени Патчахым эм мени Аллахым! Сени къурман этилиучю жерлеринги къатында, кеслерини балаларын салыргъа, чыпчыкъ да кесине жер, къарылгъач да кесине уя табады.

⁵ Сени юйюнгде жашагъанла насыплыдыла, ала Санга тохтаусуз махтау салып турлукъдула.

⁶ Аны кючю Сенде болгъан эмда аны жюрегинде жоллары Санга бурулгъан адам насыплыды.

⁷ Жиляу ёзенден ётген заманда, ала аны шаудан суулу жер этедиле, жауун да аны ахшылыкъла бла жабады.

⁸ Кючлюден кючлю болуп барадыла, Сионда Аллахны аллында кёрюнедиле.

⁹ Неге да кючю жетген Раббий Аллах, мени тилегими къабыл эт! Якъупну Аллахы, тынгыла!

¹⁰ Бизни къоруулаучу Аллах! Сен майлагъанны бетине эсинги бёл эмда къара,

¹¹ Нек десенг Сени арбазларынгда бир кюн минг кюнден да игиди. Аман адамланы чатырларында жашагъандан эсе, Аллахны юйюню босагъасыны къатында турургъа сюеме.

¹² Нек десенг Раббий Аллах кюндю эм къоруулаучуду, Раббий шафауат эм махтау береди, тюз ниетде жюрюгенлени Ол ахшылыкъсыз къоймайды.

¹³ Неге да кючю жетген Раббий! Санга ышаннган адам насыплыды!