Забур 82 - Сыйлы Инжил бла Забур

¹ Жыр. Асафны зикири.

² Аллах! Тынгылап турма, сёлешмей турма эмда тынчайып турма, Аллах!

³ Нек десенг ма Сени душманларынг дауур этедиле, Сени кёрюп болмагъанла да башларын кётюргендиле.

⁴ Сени халкъынга къажау аман ниет этгендиле эмда Сен сакълагъанлагъа къажау кенгешедиле.

⁵ Эм: «Барайыкъ да аланы миллетлени арасындан къурутуп бошайыкъ, энди Израильни аты айтылмасын», – дегендиле.

⁶ Барысы да бир тилли болгъандыла, Санга къажау болуп бирлешгендиле:

⁷ Эдомну эллери да, измаилчыла да, Моап да, хажарлыла да,

⁸ Гебал да, Аммон да, Амалек да, Филистлиле бла Тирде жашагъанла да.

⁹ Ассур да алагъа къошулгъанды; ала Лутну уланларына билек кюч болгъандыла.

¹⁰ Мидияннга болгъанны, Кишон сууну къатында Сисерагъа бла Ябиннге болгъанны алагъа да эт.

¹¹ Ала Эндорда къырылгъандыла, жерге мешхут болгъандыла.

¹² Алагъа, аланы бийлерине, Орепге бла Зепге эм битеу аланы башчыларына этгенингча, Зебахха бла Салмуннагъа этгенингча эт.

¹³ Ала уа: «Аллахны эллерин кесибизге жер юлюшге алайыкъ», – деген эдиле.

¹⁴ Я мени Аллахым! Ала бургъан желде букъуча, желни аллында къууукъча болсунла.

¹⁵ От агъачны къалай жандыра эсе, ёртен да тауланы къалай кюйдюре эсе,

¹⁶ Сени боранынг бла аланы алай къуу эмда Сени бургъан желинг бла аланы абызырат.

¹⁷ Аланы бетлерин ыспассызлыкъдан толтур, Раббий, ала Сени атынгы излесинле!

¹⁸ Ёмюрлеге да уялсынла эм жунчусунла, бедишлик болсунла эм жоюлсунла.

¹⁹ Эмда аты Раббий болгъан, жангыз Сен, битеу жерни Уллу Аллахы болгъанынгы билсинле.