Забур 81 - Сыйлы Инжил бла Забур

Асафны зикири.

¹ Аллах тейрилени жыйынында тохтагъанды, тейрилени арасында хукмуну айтып билдиргенди:

² «Сиз къачаннга дери тюзлюксюз сюд этип эмда аман адамланы жакълап турлукъсуз?

³ Жарлыгъа бла ёксюзге тюз хукму этигиз, унукъгъаннга бла инжилгеннге тюзлюк этигиз.

⁴ Жарлыны бла факъырны къутхарыгъыз, аланы аман адамланы къолларындан тартып алыгъыз.

⁵ Билмейдиле, ангыламайдыла, къарангылыкъда жюрюйдюле, жерни битеу мурдорлары титирейдиле.

⁶ „Сиз аллахласыз, сиз барыгъыз да Уллу Аллахны уланларысыз“ деп айтханма Мен.

⁷ Алай болгъанлыкъгъа сиз адамлача ёллюксюз эмда бийле бийликлеринден тюшгенча тюшериксиз», – дегенди.

⁸ Эй Аллах, тур, дуниягъа сюд эт! Нек десенг битеу миллетлеге Ие Сенсе.