Забур 80 - Сыйлы Инжил бла Забур

¹ Хорну таматасына: гитит керек бла. Асафны зикири.

² Бизге кюч берген Аллахха къууанып зикир айтыгъыз, Якъупну Аллахына къууанып къычырыгъыз!

³ Зикир айтып башлагъыз, дауурбазны, татлы тауушлу саз бла арфаны эшитдиригиз.

⁴ Жангы айлада, белгили заманда, бизни байрам кюнюбюзде сур быргъы согъугъуз,

⁵ Нек десегиз ол Израильге законду, Якъупну Аллахындан жорукъду.

⁶ Ол муну Юсюпге шагъатлыкъгъа салгъанды, ол Мисирни жеринден чыкъгъан заманда, анда билмеген тилини тауушун эшитгенди.

⁷ Ол былай айтады: «Мен аны имбашларындан жюкню алгъанма, аны къоллары да четенледен къутулгъандыла.

⁸ Къыйынлыгъынгда сен Менден тилек этгенсе, Мен да Сени къутхаргъанма; булутдан кёк кюкюреу бла санга жууап бергенме, Мерибаны сууларыны къатында сени сынагъанма.

⁹ Тынгыла, эй халкъым, Мен санга шагъатлыкъ этерикме. Израиль! Ой, сен Манга тынгылагъа эдинг!

¹⁰ Сенде башха аллах болмасын эмда киши жерли тейриге табынма.

¹¹ Сени Мисирни жеринден чыгъаргъан, сени Раббий Аллахынг Менме; сен ауузунгу ач, Мен аны толтурурма.

¹² Алай болгъанлыкъгъа Мени халкъым Мени ауазыма тынгыламады, Израиль Манга боюн салмады.

¹³ Ол себепден Мен аланы къаты жюреклери тартханны этерге бошлап къойгъанма, кеслерини ойлаулары бла жюрюсюнле.

¹⁴ Ой, Мени халкъым Манга тынгыласа эди, Израиль Мени жолларым бла жюрюсе эди!

¹⁵ Мен къысха заманда аланы душманларын бойсундурур эдим эмда алагъа зулму этгенлеге къажау къолуму айландырыр эдим.

¹⁶ Раббийни кёрюп болмаучула алагъа боюн салыр эдиле, аланы зауукъ жашаулары уа хар заманнга да бардырылыр эди.

¹⁷ Мен аланы эм иги будай бла тойдурур эдим, къаядан бал чыгъарып, аланы токъландырыр эдим».