Забур 8 - Сыйлы Инжил бла Забур

¹ Хорну таматасына: гитит керек бла. Дауутну зикири.

² Бизни Раббий Аллахыбыз! Битеу жерни юсюнде Сени атынг къалай уллуду! Сени махтауунг кёкледен да бийикге жайылады!

³ Сени жауларынг ючюн, душманны бла дертчини сёзсюз этер ючюн, къоюндагъыланы, эмчек ичген сабийлени ауузларындан Сен махтау къурагъанса.

⁴ Мен Сени кёклеринге – Сени бармакъларынгы ишине, Сен салгъан айгъа бла жулдузлагъа къарагъан заманымда,

⁵ Сора адам неди, Сен аны эсингде тутар кибик, адам улу да неди, Сен аны къайгъысын этер кибик?

⁶ Сен аны мёлекледен бираз алаша этгенсе, махтау эм хурмет тажны аны башына салгъанса;

⁷ Кеси къолларынг жаратханлагъа аны башчы этгенсе;

⁸ Битеу къойланы бла тууарланы да эм аулакъдагъы жаныуарланы да,

⁹ Кёкдеги къанатлыланы да эм тенгиздеги чабакъланы да, битеу тенгиз жол ызла бла жюрюгенлени да, барын да аны аякъ тюбюне салгъанса.

¹⁰ Бизни Раббий Аллахыбыз! Битеу жерни юсюнде Сени атынг къалай уллуду!