Забур 79 - Сыйлы Инжил бла Забур

¹ Хорну таматасына: «Кесаматны лилиялары» атлы макъам бла айтылады. Асафны зикири.

² Израильни Сюрюучюсю, тынгыла! Юсюпню, къойланы жюрютгенча жюрютюучю, керупланы юсюнде олтургъан Аллах, Кесинги ачыкъ эт.

³ Эфрайимни бла Беняминни эмда Манашени алларында Кесинги кючюнгю кёргюзт эм бизни къутхарыргъа кел.

⁴ Аллах, бизни жангыдан къура; Сени бетинг жарысын, сора къутхарылырбыз!

⁵ Неге да кючю жетген Раббий Аллах! Халкъынгы тилеклерине къачаннга дери чамланып турлукъса?

⁶ Сен алагъа жилямукъ ётмек ашатханса эм алагъа уллу марда бла жилямукъла ичиргенсе.

⁷ Бизни къоншуларыбызгъа даулашха салгъанса, душманларыбыз да бизни хыликкя этедиле.

⁸ Неге да кючю жетген Аллах! Бизни жангыдан къура; Сени бетинг жарысын, сора къутхарылырбыз!

⁹ Сен жюзюм терекни Мисирден кёчюргенсе, миллетлени къыстагъанса эм аны орнатханса.

¹⁰ Анга жер тазалагъанса эм аны тамырларын бегитгенсе, сора ол жерни толтургъанды.

¹¹ Аны ауанасы тауланы жапханды, аны бутакълары да Аллахны кедр тереклерича болгъандыла.

¹² Ол кесини бутакъларын тенгизге дери, кесини жетеклерин да Евфрат суугъа дери ийгенди.

¹³ Битеу жол бла баргъанла аны жюзюмлерин жыртыр кибик, Сен аны бурууларын не ючюн буздунг?

¹⁴ Агъач тонгуз аны тюбюн къазады, аулакъдагъы жаныуар да аны ашайды.

¹⁵ Эй неге да кючю жетген Аллах! Жалбарабыз Санга, бери айлан, кёкден къара эмда кёр эм бу жюзюм терекни жокъла.

¹⁶ Ол Сени онг къолунг орнатхан чыбыкъны эмда Сен Кесинге бегитген бутакъны a къоруула.

¹⁷ Ол от бла кюйдюрюлгенди, кесилгенди, Сени бетинги къаты къарауундан халкъынг жоюлуп барады.

¹⁸ Сени къолунг, онг жанынгдагъы киши бла, Сен аны Кесинге бегитген адам улу бла болсун.

¹⁹ Сора биз Сенден таймазбыз. Бизни тирилт, сора биз Сени атынг бла тилек этип турурбуз.

²⁰ Неге да кючю жетген Раббий Аллах! Бизни жангыдан къура, Сени бетинг жарысын, сора къутхарылырбыз!