Забур 78 - Сыйлы Инжил бла Забур

Асафны зикири.

¹ Аллах! Миллетле Сени жер юлюшюнге уруш бла кирдиле, Сени сыйлы юйюнгю харам этдиле, Иерусалимни оюп къойдула.

² Сени къулларынгы мыллыкларын кёкде учхан къанатлылагъа, Сени сыйлыларынгы ёлюклерин жердеги жаныуарлагъа ашаргъа бердиле.

³ Иерусалимни тёгерегинде аланы къанларын сууча тёкдюле, аланы асыраргъа да адам табылмады.

⁴ Биз къоншуларыбызгъа кюлкюлюк, бизни тёгерегибизде тургъанлагъа хыликкялыкъ бла бедишлик болуп къалдыкъ.

⁵ Раббий, къачаннга дери тохтаусуз чамланып турлукъса, Сени эришлигинг отча къачаннга дери жанып турлукъду?

⁶ Чамланыуунгу Сени билмеген миллетлеге эмда атынгы айтып Сени чакъырмагъан патчахлыкълагъа тёк.

⁷ Нек десенг ала Якъупну ашап къойдула, аны мекямын да чачдыла.

⁸ Бизни ата-бабаларыбызны гюняхларын бизге жетдирме: Сени ырахматынг къысха заманда аллыбызгъа чыкъсын, нек десенг биз бек къарыусуз болгъанбыз.

⁹ Бизни къутхарыучу Аллах, Сени атынгы махтауу ючюн бизге болуш, Сени атынг ючюн бизни къутхар эм бизни гюняхларыбызны кеч.

¹⁰ Миллетле: «Аланы Аллахлары къайдады?» – деп айтмасынла. Сени къулларынгы тёгюлген къанлары ючюн дерт жетдиргенинг бизни кёзлерибизни аллында миллетлени арасында белгили болсун.

¹¹ Тутмакъны ынчхагъаны Сени аллынга келсин, ёлтюрюлюрге жораланнганланы Сени къолунгу уллу кючю бла сакъла.

¹² Раббий, ала Санга айтхан аман сёзлери ючюн, бизни къоншуларыбызгъа жети кере къайтарып жетдир.

¹³ Биз а Сени халкъынгбыз эм Сени отлауларынгы къойларыбыз, ёмюрде да Санга шукур этип эм тукъумдан тукъумгъа да Сени махтауунгу билдирип турлукъбуз.