Забур 77 - Сыйлы Инжил бла Забур

Асафны юйретиу зикири.

¹ Мени халкъым, мени законума тынгыла, ауузуму сёзлерине къулагъыгъызны салыгъыз.

² Оюм берген таурух бла сёзюмю башларма, буруннгу замандан жораланнган сырланы,

³ Биз эшитгенибизни эм билгенибизни эм бизни аталарыбыз бизге айтханланы ангылатырма.

⁴ Аланы сабийлерибизден жашырмайыкъ, келлик тукъумгъа Раббийни махтауун да, Аны кючюн да, Аны этген сейирликлерин да билдирейик.

⁵ Ол Якъупда жорукъла бегитгенди эмда Израилде закон салгъанды, аны уа бизни аталарыбызгъа аланы сабийлерине билдирирге фарыз этгенди.

⁶ Келлик тукъум, тууарыкъ сабийле билир ючюн эм ала да кеслерини заманларында сабийлерине билдирир ючюн,

⁷ Аллахха ышанып турур ючюн эм Аллахны ишлерин унутмай, Аны фарызларын тутар ючюн

⁸ Эмда ала аталарыча, боюн салмагъан эм къозгъалыучу тукъумча, жюреклери тюзелмеген эмда кеслерини кёллери бла Аллахха тюз болмагъан тукъумча болмасынла деп алай этгенди.

⁹ Эфрайим улула, садакъ атыучула болуп сауутланнган эселе да, къазауат кюнде артха айландыла.

¹⁰ Ала Аллахны кесаматын тутмадыла эмда Аны законунда жюрюрге унамадыла.

¹¹ Аны этген ишлерин эмда Аны алагъа кёргюзтген сейирликлерин унутхандыла.

¹² Ол аланы аталары кёре тургъанлай Мисирни жеринде, Соан аулакъда сейирлик ишле этгенди.

¹³ Тенгизни арасын бёлгенди эм аланы аны ичи бла ётдюргенди эмда сууланы къабыргъа этип тохтатханды.

¹⁴ Кюндюз алагъа булут бла, кечени узунуна уа отну жарыгъы бла жол кёргюзтгенди.

¹⁵ Къуу жерде ташны жаргъанды эмда аланы уллу тюпсюзденча ичирип къандыргъанды.

¹⁶ Къаядан ырхыла чыгъаргъанды, суула да баргъан суулача саркъып тебирегендиле.

¹⁷ Алай болгъанлыкъгъа ала Анга къажау андан ары да гюнях этип эмда къуу жерде Уллу Аллахны чамландырып тургъандыла.

¹⁸ Кеслерини жюреклеринде Аллахны сынап, жанлары сюйген ашны даулагъандыла.

¹⁹ Сора Аллахха къажау сёлешгендиле эм: «Аллах къуу жерде аш хазырларгъа болаллыкъ болурму?» – дегендиле.

²⁰ Ма, Ол ташны ургъанды, сора, суула саркъып, шауданла да къуюлуп тебирегендиле. «Ол ётмек берирге да болаллыкъ болурму, Кесини халкъына эт тапдырыргъа болаллыкъ болурму?» – дегендиле.

²¹ Раббий муну эшитгенди эм ачыуу чыкъгъанды, сора Якъупха къажау от къабыннганды, Израильге да чамланыу къозгъалгъанды.

²² Нек десенг Аллахха ийнанмагъандыла эм Аны къутхарыууна ышанмагъандыла.

²³ Ол огъартындан булутлагъа буйрукъ этгенди эмда кёкню эшиклерин ачханды

²⁴ Эмда алагъа ашха манна жаудургъанды, алагъа кёкню будайын бергенди.

²⁵ Адам мёлеклени ётмегин ашагъанды, Ол алагъа ашны тойдургъунчугъа дери ийгенди.

²⁶ Ол, кёкде кюн чыкъгъан жанындан желни къозгъагъанды, Кесини кючю бла къыбыла жанындагъын да келтиргенди.

²⁷ Сора, букъуча, алагъа эт жаудургъанды, тенгизни юзмезича, къанатлыланы жаудургъанды.

²⁸ Аланы мекямларыны тёгерегинде, аланы ыстауатларыны арасына аланы къуйгъанды.

²⁹ Ала да ашагъандыла эм бек тойгъандыла, ала кюсегенни Ол алагъа бергенди.

³⁰ Алай а ала кюсеулерин къандыргъынчы, аш да аланы ауузларындан кетгинчи,

³¹ Аллахны чамланыуу алагъа келгенди, аланы къарыулу адамларындан бир къауумларын ёлтюргенди, Израильни жетген жашларын къыргъанды.

³² Алай болгъанлай да ала андан ары да гюнях этип тургъандыла эмда Аны сейирлик ишлерине ийнанмагъандыла.

³³ Ол себепден аланы кюнлерин гузабалыкъда, аланы жылларын да къалабалыкъда жойгъанды.

³⁴ Ол аланы ёлтюрген заманда, ала Аны излей эдиле эмда къайтыша эдиле эм танг аласындан Аллахха бурула эдиле.

³⁵ Эмда Аллах – аланы къоруулаучулары, Уллу Аллах – аланы къутхарыучулары болгъанын эслерине тюшюре эдиле

³⁶ Эмда Анга ауузлары бла кёзбау эте эдиле, тиллери бла да Анга ётюрюк айта эдиле.

³⁷ Аланы жюреклери уа Аны аллында тюзлюклю тюйюл эди эмда ала Аны кесаматына тюз тюйюл эдиле.

³⁸ Алай болгъанлыкъгъа Ол мархаматлыды, аланы гюняхларын кечип тургъанды эмда аланы къырып къоймагъанды. Кесини ачыуун кёп кере тыйгъанды эмда Кесини битеу чамланыуун къозгъамагъанды.

³⁹ Ала чарх, кетерик эм къайтмазлыкъ тылпыу болгъанларын Ол эсинде тутханды.

⁴⁰ Ала Аны къум тюзде ненча кере ачыуландыргъандыла эмда Аны къуу жерде ненча кере чамландыргъандыла!

⁴¹ Эм дагъыда Аллахны сынагъандыла эмда Израильни Сыйлысыны жанына тийгендиле.

⁴² Аны билек кючюн – Ол аланы унугъуудан къутхаргъан кюнню,

⁴³ Мисирде Кесини илишанларын, Соан аулакъда да Кесини сейирликлерин этген кюнню эслеринде тутмагъандыла.

⁴⁴ Мисирлилени баргъан сууларын да, шауданларын да къаннга бургъанды, ала ичерге болалмагъандыла.

⁴⁵ Аланы къапдырыр ючюн, алагъа ит чибинлени, аланы жойдурур ючюн, алагъа жер макъаланы ийгенди.

⁴⁶ Аланы жер битимлерин къуртха, аланы къыйынларын да мачагъа бергенди.

⁴⁷ Аланы жюзюмлерин, буз урдуруп, аланы кийик инжир тереклерин да къырау къакъдырып ууатханды.

⁴⁸ Аланы малларын буз уруугъа, аланы сюрюулерин да шыбылалагъа бергенди.

⁴⁹ Алагъа Кесини ачыууну жаннганын да, чамланыуун да, бек ачыуланнганын да, палахланы да жоюучу мёлекледен келечилени ийгенди.

⁵⁰ Кесини чамланыууна жолну тюзетгенди, аланы жанларын ёлюмден сакъламагъанды, аланы малларын да къырылыу ауруугъа бергенди.

⁵¹ Мисирде хар биринчи туугъанны, Хамны чатырларында эркекликлерини башламларын къыргъанды.

⁵² Сора Кесини халкъын къойланыча элтгенди эм аланы, сюрюунюча, къум тюзде жюрютгенди.

⁵³ Аланы сау-саламат элтгенди, ала да къоркъмагъандыла, аланы душманларын а тенгиз басханды.

⁵⁴ Сора аланы Кесини сыйлы жерине, Аны онг къолу сыйырып алгъан, бу таугъа келтиргенди.

⁵⁵ Аланы алларындан миллетлени къыстагъанды, аланы жерлерин да алагъа мюлк юлюш этип юлешгенди эмда Израильни тукъумларын аланы чатырларына жерлешдиргенди.

⁵⁶ Алай болгъанлыкъгъа ала дагъыда Уллу Аллахны сынагъандыла эм Анга къажау тургъандыла, Аны кесаматыны шартларын тутмагъандыла.

⁵⁷ Аланы аталары этгенча, артха тургъандыла эм сёзлерин бузгъандыла, къынгыр атхан садакъча терсине айланнгандыла.

⁵⁸ Кеслерини табыныучу дуппурлары бла Аны ачыуландыргъандыла эмда кеслерини таш суратлары бла Аны эришиуюн къозгъагъандыла.

⁵⁹ Аллах эшитгенди эм ачыуу чыкъгъанды эмда Израильге бек чамланнганды.

⁶⁰ Шилохадагъы мекямын, Ол анда адамла арасында тургъан чатырын атып къойгъанды,

⁶¹ Кесини сыйлы кюбюрчегин жесирге, Кесини махтаууну символун душманны къолуна бергенди

⁶² Эмда Кесини халкъын къылычха бергенди эм Кесини туудукъларына чамланнганды.

⁶³ Аланы жетген жашларын от ашап къойгъанды, аланы жетген къызларына да некях жырла айтылмагъанды.

⁶⁴ Аланы дин къуллукъчулары къылычдан жоюлгъандыла, аланы башсыз къатынлары да жиляу эталмагъандыла.

⁶⁵ Алай а Раббий, жукъудан тургъанча, чагъыр хорлагъан пелиуанча, тургъанды

⁶⁶ Эмда аны душманларын артларындан къуугъанды, аланы ёмюрлюк бедишликге бергенди.

⁶⁷ Юсюпню чатырын къабыл этмегенди, Эфрайимни тукъумун да сайламагъанды,

⁶⁸ Яхуданы тукъумун, Кеси сюйген Сион тауну сайлагъанды ансы.

⁶⁹ Сора Кесини сыйлы жерин кёкча эмда Ол аны ёмюрге да бегитген жер шарча къурагъанды.

⁷⁰ Сора Кесини къулу Дауутну сайлагъанды эмда аны къой ыстауатладан алгъанды.

⁷¹ Эм саулукъ къойладан алып, аны, Кесини халкъы Якъупну эм Кесини юлюшю Израильни кютдюрюрге келтиргенди.

⁷² Ол да аланы кесини жюрегини тазалыгъы бла кютгенди эмда хунерли къоллары бла жюрютгенди.