Забур 75 - Сыйлы Инжил бла Забур

¹ Хорну таматасына: къыл къобузла бла. Асафны зикири. Жыр.

² Аллах Яхудада белгилиди, Аны аты Израильде уллуду.

³ Аны мекямы Салимдеди, Аны тургъан жери да Сиондады.

⁴ Ол анда садакъны жаннган окъларын, къоруулаучу сауутну, къылычны, уруш сауутланы ууатханды.

⁵ Сен махтаулуса, жыртхычлы тауладан да къудуретлисе.

⁶ Къарыулу жюреклилени хазналары сыйырылгъанды, ала ёлюм жукъугъа кетгендиле, аскерчиледен бири да къолларыны къарыуларындан хайырланалмагъанды.

⁷ Якъупну Аллахы, Сени къаты буйругъунгдан тачанка да, ат да жукъусурап къалгъандыла.

⁸ Сен къоркъунчлуса, Сени чамланнган заманынгда Сени бетинги аллында ким чыдаяллыкъды?

⁹ Сен сюдню кёкледен билдиргенсе.

¹⁰ Жерни битеу унукъгъанларын къутхарыр ючюн, Аллах сюд этерге тургъан заманда жер къоркъуп эм тынып къалгъанды.

¹¹ Адамны ачыуланыуу да Санга махтаугъа айланырыкъды; ачыуну къалгъанын Сен тыярыкъса.

¹² Раббий Аллахыгъызгъа нюзюр этигиз эм айтханыгъызны этигиз. Битеу Аны тёгерегинде болгъанла, Къоркъунчлугъа саугъала келтирсинле.

¹³ Ол бийлени ёхтемликлерин чёкдюреди, Ол жерни патчахларына къоркъунчлуду.