Забур 74 - Сыйлы Инжил бла Забур

¹ Хорну таматасына: «Жоюп къойма» атлы макъам бла айтылады. Асафны зикири. Жыр.

² Шукур этебиз Санга, Аллах, шукур этебиз, нек десенг Сени атынг жууукъду; Сени сейирлик ишлеринг муну билдиредиле.

³ «Белгилеген заманымда Мен тюзлюк бла сюд этерикме.

⁴ Жер да эм битеу аны юсюнде жашагъанла да тебедиле, аны чигинжилерин Бегитиучю Менме.

⁵ Махтанчакълагъа: „Махтанмагъыз“, аман адамлагъа да: „Мюйюзлеригизни кётюрмегиз,

⁶ Мюйюзлеригизни бийик кётюрмегиз, къаты боюнлу болуп сёлешмегиз“ дейме», – дейди Аллах.

⁷ Нек десегиз кётюрюлюу не кюн чыкъгъан, не кюн батхан жанындан, не къум тюзден тюйюлдю.

⁸ Сюдю уа Аллахды: биреуню чёкдюреди, биреуню уа ёрге кётюреди.

⁹ Нек десенг аякъ Раббийни къолундады, аны ичинде, иги къатышдырылгъан чагъыр къайнайды эмда Ол андан къуяды. Жерни битеу аман адамлары аны тюбюне чёкгенин окъуна ичерикдиле.

¹⁰ Мен а ёмюрде да муну билдирип турлукъма, Якъупну Аллахына махтау зикир этип турлукъма.

¹¹ Аман адамланы битеу мюйюзлерин сындырлыкъма, сора тюзлюклюню мюйюзлери кётюрюллюкдюле.