Забур 73 - Сыйлы Инжил бла Забур

Асафны юйретиу зикири.

¹ Аллах, бизни хар заманнга да атып не ючюн къойдунг? Сени отлауларынгы къойларына Сени чамланыуунг нек жанды?

² Сен аны буруннгу замандан сатып алгъан, ол Сени Ёз халкъынг болур ючюн, Сен жулгъан жамауатынгы, Сен анда жерлешип тохтагъан бу Сион тауну эсинге тюшюр.

³ Ёмюрлюк оюлгъанла таба аякъларынгы атландыр: душман сыйлы жерде барын да бузгъанды.

⁴ Сени душманларынг Сени жыйылыучу жеринги ичинде хырылдагъандыла, хорлау белгиге кеслерини байракъларын салгъандыла.

⁵ Кеслерин агъачдагъы тереклеге балтаны ёрге кётюргенлеге ушаш кёргюзтгендиле.

⁶ Сора энди аны ичинде битеу салыннган оюуларын бир жолгъа балтала бла эм ылыхтынла бла бузгъандыла.

⁷ Сени сыйлы жеринги отда кюйдюргендиле, Сени атынгы мекямын харам этип къойгъандыла.

⁸ Кеслерини жюреклеринден: «Аланы чачып къояйыкъ», – дегендиле эмда жер башында Аллахха жыйылыучу жерлени барын да кюйдюргендиле.

⁹ Бизни илишанларыбызны биз кёрмейбиз, энди файгъамбар да жокъду эм бизни арабызда бу не заманнга дери боллугъун билген адам да жокъду.

¹⁰ Душман не заманнга дери сёгюп турлукъду, Аллах? Жау аскер Сени атынга ёмюрде да аман айтыпмы турлукъду?

¹¹ Сен къолунгу, онг къолунгу, кери нек тартаса? Аны къоюнунгдан чыгъар, аланы къорат!

¹² Жерни ортасында къутхарыу этген, ёмюрден да патчахым Аллах!

¹³ Сен кючюнг бла тенгизни ортасын айыргъанса, Сен суулада жилянланы башларын ууатханса.

¹⁴ Сен левиятанны башын ууатханса, аны къум тюзню адамларына ашха бергенсе.

¹⁵ Сен шауданланы эм ырхыланы жибергенсе, Сен уллу сууланы къурутуп къойгъанса.

¹⁶ Кюндюз Сениди, кече да Сениди, жарыкъ бериучюлени да, кюнню да Сен болдургъанса.

¹⁷ Битеу жерни чеклерин Сен салгъанса, жайны къышны да Сен къурагъанса.

¹⁸ Эсинге тюшюр муну Раббий: душман Сени сёгеди, акъылсыз адамла да Сени атынга аман айтадыла.

¹⁹ Сени кёгюрчюнюнгю жанын огъурсуз жаныуарлагъа берип къойма, унукъгъанларынгы жашауларын ёмюрге унутуп къойма.

²⁰ Кеси кесаматынга къара; нек десенг жерни битеу къарангы жерлери зулму этиу мекямладан толгъандыла.

²¹ Унукъдурулгъан ыйлыкъдырылып къайтмасын, факъыр бла къолайсыз да Сени атынга махтау салсынла.

²² Эй Аллах тур, Кеси ишинги жакъла, акъылсыз адам кюн сайын Сени сёгюп тургъанын эсинге ал.

²³ Сени душманларынгы къычырыкъларын унутма, Санга къажау тургъанланы дауурлары тохтаусуз кётюрюледи.