Забур 72 - Сыйлы Инжил бла Забур

ЮЧЮНЧЮ КИТАП

Асафны зикири.

¹ Израильге, таза жюреклилеге, Аллах къалай игиликлиди!

² Мен а бутларым тентирерге аздан къалдым, аякъларым таяргъа аздан къалдым.

³ Аман адамланы саламат жашагъанларын кёргенимде, мен ёхтемлеге сукъланнган эдим.

⁴ Нек десенг ала ёлгюнчю да алагъа къыйналыу жокъду эмда аланы къарыулары уллуду.

⁵ Башха адамлача къайгъы сынамайдыла, башха инсанла кибик къыйынлыкъ кёрмейдиле.

⁶ Ол себепли ёхтемлик минчакълача аланы тёгереклерин алгъанды, залимлик да кийимча аланы кийиндиреди.

⁷ Семизликден аланы кёзлери чартлап чыгъадыла, жюреклеринде аман акъыл къайнайды.

⁸ Барын да хыликкя этедиле, зулму этиулерини юсюнден махтанып айтадыла, эсирик сёлешедиле.

⁹ Ауузларын кёклеге къажау кётюредиле, аланы тиллери да жер башында жюрюп турады.

¹⁰ Ол себепден Аны халкъы окъуна алагъа бурулады, ала толу аякъ бла суу ичедиле

¹¹ Эмда: «Аллах къалай билир? Уллу Аллахны билими болурму?» – дейдиле.

¹² Ма аман адамла былайдыла, хар заманда да айнып барадыла, байлыкъларын кёп этедиле.

¹³ Сора мен керексизгеми жюрегими тазалап эмда тюзлюкде къолларымы жуууп тургъанма

¹⁴ Эмда кесими хар кюнден жаралагъа, хар эрттенликден да жазалагъа тюбетип тургъанма?

¹⁵ Алай а мен: «Былай айтырыкъма», – десем эди, мен Сени уланларынгы тукъумуну аллында терс болур эдим.

¹⁶ Сора мен, муну къалай ангылайым деп сагъыш этген эдим, алай болгъанлыкъгъа,

¹⁷ Мен Аллахны сыйлы жерине киргинчи эмда аланы ахырларын ангылагъынчы, бу манга къыйын кёрюне эди.

¹⁸ Кертиси бла Сен аланы учхалауукъ жоллагъа салгъанса эмда аланы энишге атып халек этесе.

¹⁹ Билмей тургъанлай ала къалай чачылып, къоркъунчлу затладан жоюлуп думп болуп къалдыла!

²⁰ Адам тюш кёрюп уяннгандан сора къалай бола эсе да, Раббий, Сен да туруп, аланы бош умутларын алай сансыз этип къоярыкъса.

²¹ Мени жюрегим къайнагъан эмда ичим термилген заманда

²² Мен жахил эдим эмда ангыламай эдим, мен Сени аллынгда хайыуан кибик эдим.

²³ Алай а мен хар заманда да Сени блама, Сен мени онг къолумдан тутуп тураса.

²⁴ Сен мени оноуунг бла жюрютесе, андан сора да мени аламатлыгъынга къабыл этериксе.

²⁵ Манга кёкде Сенден башха ким барды? Сени бла бирге болсам, жер башында бир зат да излемейме.

²⁶ Мени чархым да, мени жюрегим да онгсуз болады, алай болгъанлыкъгъа, мени жюрегими таянчагъы эм мени юлюшюм ёмюрге да Аллахды.

²⁷ Нек десенг ма кеслерин Сенден узайтханла жоюллукъдула, Сенден тайгъанланы хар бирин Сен жокъ этесе.

²⁸ Манга уа Аллахха жууукълашханым игиди! Мен Сени битеу ишлеринги билдирир ючюн ышаныууму, Раббий Аллах, Санга салып турама.