Забур 71 - Сыйлы Инжил бла Забур

Сюлеменни юсюнден.

¹ Аллах! Патчахха Сени хукмунгу, патчахны уланына да Сени тюзлюгюнгю бер.

² Сени халкъынга тюзлюк бла эм Сени факъырларынга тюз оноу бла хукму этсин.

³ Таула эмда дуппурла халкъгъа тюзлюк бла ырахатлыкъ келтирсинле.

⁴ Халкъны факъырларына тюз хукму этсин, къолайсызны уланларын къутхарсын, зулмучуну уа бойсундурсун.

⁵ Сора кюн бла ай тургъан заманда, тукъумладан тукъумлагъа да Сенден къоркъурукъдула.

⁶ Ол, чалыннган биченликге жауун жаугъанча, жерни сугъаргъан сакъ жауунча тюшерикди.

⁷ Аны заманында тюзлюклю айнырыкъды эмда ай тохтагъынчы окъуна, ырахатлыкъ кёп боллукъду.

⁸ Ол тенгизден тенгизге дери эм Евфрат суудан жерни этеклерине дери ие боллукъду.

⁹ Къум тюзледе жашагъанла аны аллында баш урлукъдула, аны душманлары да топуракъ жаларыкъдыла.

¹⁰ Таршишни эм айрыкамланы патчахлары анга жасакъ берликдиле, Шебаны эм Себаны патчахлары саугъала келтирликдиле.

¹¹ Битеу патчахла анга баш урлукъдула, битеу миллетле анга къуллукъ этерикдиле.

¹² Нек десенг болушлукъ излеп къычырыкъ этген факъырны эмда болушлукъчусу болмагъан унукъдурулгъанны ол къутхарлыкъды.

¹³ Жарлыгъа бла къолайсызгъа жумушакъ жюрекли боллукъду эмда къолайсызланы жанларын сакъларыкъды.

¹⁴ Хыйладан бла зулмудан аланы жанларын къутхарлыкъды, аны кёзлерини аллында аланы къанлары багъалы боллукъду.

¹⁵ Сора жашап турлукъду эмда анга Шебаны алтынындан берип турлукъдула эмда аны ючюн тохтаусуз тилек этип, хар кюнден анга алгъыш этип турлукъдула.

¹⁶ Жер юсюнде, тауланы башында, мирзеу эркин боллукъду. Аны битимлери, Ливанны агъачыча чайкъаллыкъдыла, шахарлада да адамла, жердеги кырдыкча кёп боллукъдула.

¹⁷ Аны аты ёмюрге да турлукъду; кюн не заманнга дери турлукъ эсе да, аны аты да билдирилип турлукъду. Эмда аны юсю бла адамлагъа ыразылыкъ берилликди; битеу миллетле аны алгъышларыкъдыла.

¹⁸ Израильни Аллахы, Раббий Аллах алгъышлыды! Аламат ишле этиучю жангыз Олду!

¹⁹ Аны махтаулу аты ёмюрге да алгъышлыды, битеу жер да аны махтауундан толлукъду. Амин эмда амин!

²⁰ Ишай улу Дауутну тилеклери бошалдыла.