Забур 70 - Сыйлы Инжил бла Забур

¹ Раббий, Санга ышанама, ёмюрге да айыплы болмайым.

² Сени тюзлюгюнг бла мени къутулт эмда мени азат эт, манга къулагъынгы ийилт эмда мени къутхар.

³ Мен анда хар заманда да бугъунургъа болалырча, манга деменгили къая бол. Сен мени къутхарыргъа буюргъанса, нек десенг мени къаям да, мени къалам да Сенсе.

⁴ Мени Аллахым! Аман адамны къолундан, законсузну бла зулмучуну къолундан мени къутхар.

⁵ Нек десенг Сенсе мени ышаннганым. Раббий Аллах, жаш заманымдан беричи да Сенден умут этип турама.

⁶ Къарында заманымдан бери да мен Санга ышанып тургъанма. Анамы къарынындан мени Сен чыгъаргъанса, мени Санга махтау салыуум тохтарыкъ тюйюлдю.

⁷ Кёплеге мен тамаша кибик болгъанма, нек десенг мени къаты ышаннганым Сенсе.

⁸ Сени аламатлыгъынга сау кюнню зикир этип турур ючюн, мени ауузум махтаудан толсун.

⁹ Къартайгъанымда, мени къабыл этмей къойма, мени къарыуум аз болуп баргъан заманда, мени атып къойма.

¹⁰ Нек десенг мени душманларым манга къажау сёлешедиле, мени жанымы марап тургъанла да кеси араларында кенгешедиле:

¹¹ «Аллах аны атып къойгъанды. Аны ызындан къууугъуз да тутугъуз, нек десегиз къутхаргъан жокъду», – дейдиле.

¹² Аллах, менден узакъ болма! Я мени Аллахым, манга болушургъа ашыкъ!

¹³ Мени жаныма къажау душманлыкъ этгенле уялсынла, думп болсунла, манга аманлыкъ излегенле айыплы эм бедишлик болсунла!

¹⁴ Мен а хар заманда да Санга ышанып эмда Санга кёпден кёп махтау салып турлукъма.

¹⁵ Мени ауузум Сени тюзлюгюнгю, хар кюнден Сени къутхарыуунгу билдирип турлукъду, нек десенг мен аны мардасын билмейме.

¹⁶ Раббий Аллахны къудуретли ишлерин билдирирге келликме. Сени – жангыз Сени тюзлюгюнгю эсиме аллыкъма.

¹⁷ Аллах! Сен мени жашлыгъымдан бери манга акъыл юйретип тургъанса, мен эндиге дери да Сени аламат ишлеринги билдирип турама.

¹⁸ Къартлыгъыма дери да, чал болгъан заманыма дери да мени атып къойма, Аллах. Мен Сени кючюнгю бу тукъумгъа эм Сени къудуретинги битеу келлик тукъумлагъа билдиргинчиге дери мени бла бол.

¹⁹ Аллах, Сени тюзлюгюнг кёклеге жетеди, Сен уллу ишле этгенсе. Аллах, Санга ушагъан ким барды?

²⁰ Сен манга кёп къыйынлыкъла эм палахла ийген эдинг, алай а дагъыда тирилтириксе мени эм жерни теренинден дагъыда чыгъарлыкъса мени.

²¹ Сен кётюргенсе мени эмда жапсаргъанса мени.

²² Мени Аллахым, мен да Санга, Сени хакъ кертинге арфа бла махтау саллыкъма. Израильни Сыйлысы, Санга саз бла зикир этерикме!

²³ Мен Санга зикир айтхан заманымда, мени ауузум да, мени Сен къутхаргъан жаным да къууанадыла.

²⁴ Мени тилим да хар кюнден Сени тюзлюгюнгю билдирип турлукъду, нек десенг манга аманлыкъны излегенле уялгъандыла эм бедишлик болгъандыла.