Забур 68 - Сыйлы Инжил бла Забур

¹ Хорну таматасына: «Лилияла» атлы макъам бла айтылады. Дауутну зикири.

² Аллах, мени къутхар, нек десенг суула мени жаныма дери жетгендиле.

³ Мен терен батмакъгъа батып къалгъанма, аякъ басар жерим да жокъду. Сууланы теренине киргенме эмда аланы къаты барыулары мени алып кетедиле.

⁴ Мен асыры къычырыкъ этгенден онгсуз болгъанма, тамагъым къарылгъанды, Аллахымы болушлугъун сакълауумдан мени кёзлерим термилгендиле.

⁵ Мени керексизге кёрюп болмагъанла, башымдагъы чач тюклеримден эсе кёпдюле. Мени жокъ этерге излегенле, сылтаусуз манга душман болгъанла кючленнгендиле; мен сыйырмагъанымы берирге керекме.

⁶ Аллах! Сен билесе мени акъылсызлыгъымы, мени гюняхларым да Сенден жашырылып тюйюлдюле.

⁷ Неге да кючю жетген Раббий Аллах, битеу Санга ышаннганла мени амалтын айып алмасынла. Израильни Аллахы, Сени излегенле мени амалтын ыйлыкъмасынла.

⁸ Нек десенг мен Сени ючюн атымы аманнга чыгъарыугъа тёземе эмда бетими бедишликден жабама.

⁹ Мен къарындашларыма тыш адам, анамы жашларына да киши адам болуп къалгъанма.

¹⁰ Нек десенг Сени юйюнг ючюн эришлигим мени ашап къояды, Санга аман айтханланы бедиш сёзлери Мени юсюме тюшгендиле.

¹¹ Жиляп ораза тутама, муну да манга бедишге саладыла.

¹² Юсюме да кийимни орунуна зыбыр чепкен киеме эмда адамлагъа таурухлукъ болама.

¹³ Къабакъ аллында олтургъанла мени юсюмден хапар этедиле, ичгичиле да жырларында жырлайдыла.

¹⁴ Мен а Сен ыразы болгъан кезиуде Сенден тилек этеме, Раббий. Аллах, Сени уллу ахшылыгъынг бла, Сени къутхарыуунгу хакъ кертилиги бла мени тилегими къабыл эт.

¹⁵ Мен батып къалмаз ючюн, мени батмакъдан чыгъар, мени кёрюп болмагъанладан бла терен сууладан къутулайым.

¹⁶ Сууланы терк баргъаны мени алып кетмесин, тенгизни терени мени жутуп къоймасын, мен тюпсюзде батып къалмайым.

¹⁷ Раббий, мени тилегими къабыл эт, нек десенг Сени мархаматынг игиди. Сени уллу ырахматынг бла манга къара.

¹⁸ Къулунгдан бетинги жашырып къойма, нек десенг мен бушман болама. Мени тилегими кёп турмай къабыл эт.

¹⁹ Мени жаныма жууукъ бол, аны къутулт, душманларым амалтын мени къутхар.

²⁰ Сен мени сёгюлюуюмю, айыбымы эм бедишлигими билесе, мени душманларымы барын да кёресе.

²¹ Аман сёзле мени жюрегими сындыргъандыла эмда мен онгсуз болгъанма. Жазыкъсыныуну сакълап тургъанма, алай болгъанлыкъгъа, ол жокъду. Жапсарыучуланы излегенме, алай болгъанлыкъгъа тапмайма.

²² Сора манга ашха ёт бергендиле, мени суусаплыгъымда да манга сиркесуу ичиргендиле.

²³ Аланы ашлары алагъа тузакъ болсун, аланы ырахат сыйланып олтуруулары, къапхан болсун!

²⁴ Аланы кёзлери кёрмез кибик къарангы болсун! Беллерин да ёмюрлюкге къарыусуз эт!

²⁵ Ачыуунгу алагъа тёк, Сени чамланыуунгу жаннганы да аланы тутуп алсын.

²⁶ Аланы юйлери бош къалсын, аланы чатырларында да жашагъанла болмасынла.

²⁷ Нек десенг Сен ургъаннга, ала дагъыда артыкълыкъ этедиле эмда Сен жара салгъанланы азап чегиулерине кёл кенгдиредиле.

²⁸ Аланы терсликлерини юсюне терсликлерин сал эмда ала Сени тюзлюгюнге кирмесинле.

²⁹ Ала сауланы китабындан кетерилсинле, тюзлюклюле бла да жазылмасынла.

³⁰ Мен а харипме эмда термилеме. Аллах, Сени болушлугъунг мени ёрге къобарсын.

³¹ Мен Аллахымы атына зикир айтып махтау саллыкъма, шукур этип Аны кётюрлюкме.

³² Бу да Раббийге, ёгюзден эсе, мюйюзлери бла эм туякълары бла бугъадан эсе иги кёрюнюрюкдю.

³³ Инжилгенле муну кёрлюкдюле эмда къууанырыкъдыла. Аллахны излегенле, сизни жюрегигиз тирилирикди.

³⁴ Нек десенг Раббий факъырланы тилеклерин къабыл этеди, Кесини тутмакъдагъыларын да сансыз этип къоймайды.

³⁵ Кёкле да, жер да, тенгизле да эм битеу алада жюрюгенле да Анга махтау салсынла.

³⁶ Нек десенг Аллах Сионну къутхарлыкъды, Яхуданы шахарларын къурарыкъды. Анда жерлеширикдиле эмда анга ие боллукъдула.

³⁷ Аны къулларыны туудукълары да анда жашарыкъдыла, Аны атын сюйгенле да анда жерлеширикдиле.