Забур 67 - Сыйлы Инжил бла Забур

¹ Хорну таматасына: Дауутну зикири. Жыр.

² Аллах кётюрюлсюн, Аны душманлары да чачылсынла, Аны кёрюп болмагъанла да Аны аллындан къачсынла!

³ Тютюн къалай чачыла эсе да, Сен аланы алай чач; балаууз отдан къалай эрий эсе да, аман адамла Аллахны аллында алай жоюлсунла.

⁴ Тюзлюклюле уа къууанч этсинле, Аллахны аллында сюйюнсюнле эмда къууанчлыкъ бла кёл кенгдирсинле.

⁵ Бизни Аллахыбызгъа зикир айтыгъыз, Аны атына махтау зикир айтыгъыз, къуу жерледе Жюрюгеннге жол хазырлагъыз. Аны аты Раббийди эмда Аны аллында къууаныгъыз.

⁶ Ёксюзлени атасы эмда башсыз къатынланы сюдюсю Аллах Кесини сыйлы мекямындады.

⁷ Аллах жангызланы юйге кийиреди, тутмакъланы бугъоуларындан азат этеди; боюн салмагъанла уа исси къум тюзде къаладыла.

⁸ Аллах! Сен Кесинги халкъынгы аллында атланнган заманынгда, Сен къум тюзде жюрюген заманда,

⁹ Жер титирей эди, Аллахны аллындан кёкден жауун жауа эди, Аллахны, Израильни Аллахыны аллындан Синай тау да титирей эди.

¹⁰ Аллах, Сен уллу жауун жаудургъанса, Кеси жеринг битимсиз болгъан заманда да Сен анга кюч бергенсе.

¹¹ Сени халкъынг анда жерлешгенди. Аллах, Сени ахшылыгъынгдан, жарлыгъа кереклини Сен хазырлагъанса.

¹² Раббий буйрукъ бергенди, сюйюнчюлюк айтыучу тиширыула да бек кёпдюле:

¹³ «Аскерлени патчахлары къачадыла, къачадыла, юйюнде олтургъан тиширыу а душмандан къалгъан хазнаны юлешеди», – дейдиле.

¹⁴ Кесигизни ыстауатларыгъызда тохтап, сиз, къанатлары кюмюш бла, тюклери уа таза алтын бла тышланнган кёгюрчюнча болуп къалгъансыз.

¹⁵ Неда къолундан келген Аллах бу жерде патчахланы чачхан заманда, бу жер Салмонда къар кибик агъаргъан эди.

¹⁶ Аллахны тауу – Башан тау! Бийик тау – Башан тау!

¹⁷ Аллах анда турургъа иги кёрген эмда Раббий ёмюрде да турлукъ таугъа, бийик таула, сиз не зарланып къарайсыз?

¹⁸ Аллахны тачанкалары тул-туманладыла, минг мингледиле. Раббий Синайда болгъаныча аланы арасындады, сыйлы жердеди.

¹⁹ Сен бийикге чыкъгъанса, жесирлени жесирлегенсе, адамладан – боюн салмагъан адамладан окъуна саугъала алгъанса. Раббий Аллах анда турлукъду.

²⁰ Хар кюнден къыйынлыкъларыбызны юсюбюзден алгъан Раббийге шукур болсун! Бизни къутхарыучу Аллах Олду.

²¹ Бизни Аллахыбыз къутхарыучу Аллахды, ёлюмден къутхарыу Раббий Аллахны къолундады.

²² Алай а Аллах Кесини душманларыны башын, кесини законсузлукъларындан тюзелмезликни чачлы тёппесин ууатырыкъды.

²³ Раббий былай айтханды: «Мен аланы Башандан къайтарлыкъма, тенгизни теренинден чыгъарлыкъма,

²⁴ Сен аягъынгы къаннга батдырырса, сени итлеринг да душмандан пайларын алырла», – дегенди.

²⁵ Аллах, Сени жюрюгенинги кёргендиле, мени Аллахымы, мени Патчахымы сыйлы жеринде жюрюгенин кёргендиле.

²⁶ Алда зикир айтханла, артда музыка сокъгъанла, ортада къызла дауурбазла къагъа, бара эдиле:

²⁷ «Жыйылыулада Раббий Аллахха шукур этигиз, сиз – Израильни урлугъундан болгъанла!», – дей эдиле.

²⁸ Аланы бийлери кичи Бенямин андады; Яхуданы бийлерини жыйыны, Забулонну бийлери, Нафталини бийлери андадыла.

²⁹ Сени Аллахынг санга кюч буюргъанды. Аллах, Сен бизге этгенинги бегим эт.

³⁰ Сени Иерусалимдеги сыйлы юйюнг ючюн патчахла Санга саугъала келтирликдиле.

³¹ Къамиш ичинде жаныуарны, халкъланы таналары бла бирге бугъа сюрюуню тый; ала, гырт кюмюшле келтирип, Санга боюн салсынла. Урушланы сюйген халкъланы чач.

³² Мисирден оноучула келликдиле Эфиопия къолларын Аллахха узатырыкъды.

³³ Жерни патчахлыкълары! Аллахха зикир айтыгъыз, Раббийге,

³⁴ Ёмюрден да кёклени кёклеринде Жюрюгеннге махтау зикир этигиз. Ма, Ол Кесини ауазын, кючлю ауазын чыгъарады!

³⁵ Аллахны къудуретин айтып билдиригиз! Аны уллулугъу Израильни юсюндеди, Аны къудурети да булутла юсюндеди.

³⁶ Аллах, Сен сыйлы жерингде къоркъунчлуса, Израильни Аллахы Кесини халкъына кюч эм къарыу береди. Алгъышлыды Аллах!