Забур 64 - Сыйлы Инжил бла Забур

¹ Хорну таматасына: Дауутну зикири. Жыр.

² Аллах, Сионда махтау Санга тийишлиди эмда Санга этилген нюзюр Иерусалимде толтуруллукъду.

³ Сен тилекни къабыл этесе, хар инсан да болушлукъ излеп Санга келеди.

⁴ Законсузлукъ ишле мени хорлайдыла: бизни терсликлерибизни Сен кечгенсе.

⁵ Ол Сени арбазларынгда жашар ючюн, Сен аны сайлагъан эм жууукъ этген адам насыплыды. Сени юйюнгю, Сени сыйлы мекямынгы ахшылыкъларындан токъ боллукъбуз.

⁶ Тюзлюклю хукмунг бла къоркъунчлу ишле этип, бизни тилегибизни къабыл этесе, битеу жерни этеклеринде эмда эм узакъ тенгизде болгъанланы ышаннганлары, бизни Къутхарыучу Аллахыбыз Сенсе.

⁷ Кесини къарыуу бла тауланы салгъан, уллу кючюн белине къысхан,

⁸ Тенгизлени тауушун, аланы толкъунларыны тауушун эмда халкъланы къозгъалыуларын тохтатыучу Сенсе!

⁹ Жерни этеклеринде жашагъанла да Сени илишанларынгдан къоркъурукъдула. Кюн чыгъышда да, кюн батышда да Кесинге махтау зикир айтдырлыкъса.

¹⁰ Сен жерни жокълап келесе эмда аны суусабын къандыраса, аны уллу байыкъдыраса. Аллахны череги суудан толуду. Сен барына да мирзеу хазырлайса; нек десенг жерни алай къурагъанса.

¹¹ Аны баразаларын къандыраса, аны тугулларын тюзетесе, аны жауунну тамычылары бла жумушатаса, аны ёсгенлерине берекет бересе.

¹² Сен ахшылыгъынг бла жылны тамам этесе, Сени жол ызларынг да жау тёгедиле,

¹³ Къуу жайлыкълагъа тёгедиле, дуппурла да беллерине къууанчлыкъны къысадыла.

¹⁴ Жайлыкъла сюрюуледен жасанадыла, ёзенле да тирликле бла жабыладыла, къууанып къычырадыла эмда жырлайдыла.