Забур 63 - Сыйлы Инжил бла Забур

¹ Хорну таматасына: Дауутну зикири.

² Аллах, мен тилек этгенимде мени ауазымы эшит, мени жанымы душманны къоркъутууундан сакъла.

³ Огъурсуз адамланы аман ниетлеринден, аманлыкъчыланы къозгъалыуларындан мени букъдуруп къой.

⁴ Ала кеслерини тиллерин къылыч кибик жютю этгендиле, айыпсыз адамгъа жашыртын атар ючюн, кеслерини ачыу сёз садакъларын тартхандыла.

⁵ Ала анга билмей тургъанлай атадыла, къоркъгъан да этмейдиле.

⁶ Ала аман ниетлерин толтурургъа бегим этгендиле. Жашыртын тузакъ салыргъа кенгешедиле эмда: «Бизни ким кёрлюкдю?» – дейдиле.

⁷ Аманлыкъланы излеп табадыла. «Тузагъыбызны тап салгъанбыз», – дейдиле. Адамны ичи эм жюреги къалай теренди!

⁸ Алай болгъанлыкъгъа Аллах аланы садакъ бла урлукъду. Ала билмей тургъанлай ачырыкъдыла.

⁹ Кеслерини тиллери бла ала кеслери кеслерин халек этерикдиле, аланы кёргенле бары да аладан къачарыкъдыла.

¹⁰ Сора битеу адамла къоркъурукъдула эм Аллахны этгенин билдирликдиле эмда ол зат Аны иши болгъанына тюшюнюрюкдюле.

¹¹ Тюзлюклю уа Раббийни хакъындан къууанч этерикди эмда Анга ышанырыкъды, сора битеу тюз жюреклиле Аны бла махтанырыкъдыла.