Забур 62 - Сыйлы Инжил бла Забур

¹ Дауутну зикири, ол Яхуданы къум тюзюнде болгъан заманда жазылгъанды.

² Аллах! Мени Аллахым Сенсе, Сени танг жарыгъындан излейме мен. Къуругъан, битимсиз эм суусуз жерде мени жаным Санга термиледи, мени чархым Сени кюсейди.

³ Мен, Сени сыйлы жерде кёргеним кибик, Сени кючюнгю эм Сени махтауунгу кёрюрге термилеме.

⁴ Нек десенг жашаудан эсе Сени мархаматынг игиди. Мени ауузум Санга махтау саллыкъды.

⁵ Мен ёмюрюмде Санга алай шукур этип турлукъма, Сени атынга къолларымы ёрге кётюрлюкме.

⁶ Жатхан жеримде мен Сени эсиме тюшюрген заманымда, кечеги сакълауулланы кезиуюнде Сени хакъынгдан ойлашхан заманымда,

⁷ Жиликден бла жаудан токъ болгъанча мени жаным токъ болады эмда къууанч ауаз бла мени ауузум Санга махтау салады.

⁸ Нек десенг мени болушлукъчум Сенсе эмда Сени къанатларынгы тюбюнде къууанч этерикме.

⁹ Мени жаным Санга жабышханды; Сени онг къолунг манга болушады.

¹⁰ Мени жанымы жоюлурун излегенле уа, жерни тюбюне кирликдиле.

¹¹ Ала къылычны ауузу бла ёлтюрюллюкдюле, тюлкюлеге аш боллукъдула.

¹² Патчах а Аллахны хакъындан къууанч этерикди, Аны бла ант этгенлени бары да Аны бла махтанырла; нек десенг ётюрюк айтыучуланы ауузлары бителликди.