Забур 61 - Сыйлы Инжил бла Забур

¹ Хорну таматасына: Иедутунну макъамы бла. Дауутну зикири.

² Мени жаным жаланда Аллахда ырахат болады, мени къутхарылыуум Анданды.

³ Мени къаям эм къутхарыучум, мени къалам – жангыз Олду; бир заманда да тентирерик тюйюлме.

⁴ Сиз не заманнга дери адамгъа къадалып турлукъсуз? Сиз къоратыллыкъсыз, сиз барыгъыз да, оюлургъа тебиреген къабыргъа кибиксиз, ауаргъа тебиреген буруу кибиксиз.

⁵ Жаланда аланы муратлары аны бийикден агъызыргъады. Ётюрюкден зауукъ этедиле; ауузлары бла алгъыш, жюреклеринде уа къаргъыш этедиле.

⁶ Мени жаным, жаланда Аллахда ырахат болады! Нек десенг мени ышаныуум Ангады.

⁷ Мени къаям эм къутхарыучум, мени къалам жангыз Олду: тентирерик тюйюлме.

⁸ Мени къутхарылыуум да, мени махтауум да Аллахдады; мени кючлю къаям да, мени ышыгъым да Аллахды.

⁹ Эй халкъ! Хар заманда да Анга ышаныгъыз, Аны аллында жюрегигизни тёгюгюз. Бизни ышыгъыбыз Аллахды.

¹⁰ Къара халкъны адамлары жаланда фанадыла. Асыл адамла ётюрюкдюле. Аланы базманнга салгъанда, ала барысы да бирге солуудан да женгилдиле.

¹¹ Тонаучулугъугъузгъа ышанмагъыз, урлауугъуз бла да бош махтанмагъыз. Байлыгъыгъыз кёп болгъан заманда, анга жюреклеригизни салмагъыз.

¹² Кюч Аллахда болгъанын Аллах бир кере айтханды, мен а аны эки кере да эшитгенме.

¹³ Сора Сендеди, Раббий, мархамат; нек десенг Сен хар кимге да аны этген ишлерине кёре тийишлисин бересе.