Забур 60 - Сыйлы Инжил бла Забур

¹ Хорну таматасына: къыл къобуз бла айтылады. Дауутну зикири.

² Аллах, мени къычырыкъ этгеними эшит, мени тилек этиуюме тынгыла!

³ Мен жюрегими мудахлыгъында жерни этегинден Санга къычырыкъ этеме: мен чыгъалмазлыкъ къаягъа мени чыгъар.

⁴ Нек десенг мени ышыгъым Сенсе, душмандан къоруулаучу кючлю къалам Сенсе.

⁵ Мен Сени мекямынгда ёмюрде да жашайым эмда Сени къанатларынгы ышыгъыны тюбюнде тынчаяйым.

⁶ Нек десенг Аллах, Сен мени нюзюр этгенлерими эшитгенсе эмда Сени атынгдан къоркъгъанлагъа юлюш бергенсе.

⁷ Патчахны ёмюрюн узакъ эт, аны жылларын тукъумдан тукъумгъа бардырып тур.

⁸ Ол Аллахны аллында ёмюрде да турсун. Аны сакъларгъа мархаматха бла хакъ кертиге фарыз эт.

⁹ Сора Сени атынга ёмюрде да зикир айтып турлукъма, хар кюнден нюзюр этгенлерими толтурлукъма.