Забур 6 - Сыйлы Инжил бла Забур

¹ Хорну таматасына: сегиз къыллы къобуз бла. Дауутну зикири.

² Раббий! Мени чамланыуунг бла айыплама эмда манга ачыуланыуунг бла азап салма.

³ Манга жазыкъсын, Раббий, нек десенг мен къарыусузма; мени сау эт, Раббий, нек десенг мени сюеклерим титирейдиле.

⁴ Мени жаным да бек титирейди; Сен а, Раббий, къачаннга дери болушмай турлукъса?

⁵ Раббий, мени жанымы энтда къутулт, Сени мархаматынгы хатеринден мени къутхар,

⁶ Нек десенг ёлюмде Сени эсде тутуу жокъду: ахыратда ким шукур этерикди Санга?

⁷ Мен ахтыныуларымдан талгъанма; хар кечеден жатхан жерими кёз жашларым бла жууама, жилямукъларым бла тёшегими жибитеме.

⁸ Мени кёзлерим жарсыудан къуругъандыла, душманларым амалтын къарыусуз болгъандыла.

⁹ Законсузлукъ этиучюле, барыгъыз да мени къатымдан тайыгъыз, мени жилягъан ауазымы Раббий эшитгенди.

¹⁰ Мени жалбарыууму Раббий эшитгенди, Раббий мени тилегими къабыл этеди.

¹¹ Мени битеу душманларым уяллыкъдыла эм бек къоркъурукъдула, къарап-къарагъынчы ызларына буруллукъдула эм айыпха тюшерикдиле.