Забур 58 - Сыйлы Инжил бла Забур

¹ Хорну таматасына: «Жоюп къойма» атлы макъам бла айтылады; Дауут жазгъан зикирди; аны ёлтюрюр ючюн, Шауул аны юйюн сакъларгъа адамла ийген заманда жазылгъанды.

² Эй Аллахым! Душманларымдан мени къутхар, манга къажау тургъанладан мени къоруула.

³ Законсузлукъ этиучюледен мени къутхар, къан ичиучюледен къутулт.

⁴ Нек десенг ма, ала мени жанымы марлап турадыла; зулмучуланы манга къажау жыйылгъанлары, мени аманлыкъ этгеним ючюн эм мени гюняхым ючюн тюйюлдю, Раббий.

⁵ Мени терслигим болмагъанлай манга чабып басынадыла эм сауутланадыла. Манга болушургъа тебире эмда къара!

⁶ Неге да кючю жетген Аллах, Израилни Аллахы, Раббий, Сен битеу миллетлеге азап салыргъа тур, сатлыкъ, законсуз адамладан бирин да аяп къойма.

⁷ Ала ингирде къайтадыла, парийлеча улуйдула эмда шахарны тёгерегине айланадыла.

⁸ Ма, ала кеслерини тиллери бла аман сёзле къусадыла; аланы ауузларындагъыла къылычладыла, ала: «Ким эшитеди?» – деп ойлайдыла.

⁹ Раббий, Сен а аланы хыликкя этериксе, Сен битеу миллетлени масхара этериксе.

¹⁰ Эй Кючюм, мен Сени болушлугъунгу сакълайма, нек десенг мени къоруулаучум Аллахды.

¹¹ Манга мархамат этиучю Аллахым мени аллымда боллукъду. Аллах мени душманларыма къоркъуусуз къаратырыкъды.

¹² Аланы ёлтюрюп къойма, алайсыз мени халкъым унутуп къояр; кючюнг бла аланы чач эмда аланы агъыз, бизни къоруулаучубуз, Раббий.

¹³ Аланы тиллерини сёзю, аланы ауузларыны гюняхыды. Ала этген къаргъышлары эм ётюрюклери ючюн кеслерини ёхтемликлери бла тутулсунла.

¹⁴ Аланы чамланыуунгда чач, ала жокъ болур кибик чач; жерни этегине дери да Якъупха Аллах бийлик этгенин билсинле.

¹⁵ Ингирде къайтсынла, парийлеча улусунла эмда шахарны тёгерегине айлансынла.

¹⁶ Аш табар ючюн къыдырып айлансынла, кечелерин да тоймагъанлай ашырсынла.

¹⁷ Мен а Сени кючюнге зикир этерикме эмда, танг аласындан башлап Сени мархаматынга махтау зикир айтырыкъма; нек десенг Сен мени къыйынлыкъ кюнюмде манга къала эмда къысылыр жер болгъанса.

¹⁸ Эй Кючюм! Санга зикир этерикме мен; нек десенг Аллах мени жакъчымды, манга мархамат этиучю Аллахымды.