Забур 57 - Сыйлы Инжил бла Забур

¹ Хорну таматасына: «Жоюп къойма» атлы макъам бла айтылады. Дауут жазгъан зикирди.

² Кертиси бла да сиз, сюдюле, тюзмю айтасыз, адам улула да, тюз сюдмю этесиз?

³ Угъай, жюрегигизде законсузлукъ этесиз, жер башында къолларыгъыз этген аманлыкъланы базманнга саласыз.

⁴ Аман адамла туугъан заманларындан окъуна тюз жолдан таядыла, жалгъан айтып аналарыны къарынында заманларындан бери окъуна ажашадыла.

⁵ Аланы уулары, жилянны ууу кибикди, кесини къулакъларына буштукъ этген

⁶ Эмда уста хыйны этиучю дууачыны ауазын да эшитмеген, сангырау кобра жилянны ууу кибикди.

⁷ Аллах! Аланы тишлерин аланы ауузларында ууат. Раббий, жаш асланланы жаякъларын сындыр!

⁸ Акъгъан сууча, думп болсунла; садакъларын тартхан заманларында, ала сыннганча болуп къалсынла.

⁹ Эрип баргъан текелемюйюзча думп болсунла, тиширыуну замансыз кетерген сабийича, кюнню кёрмесинле.

¹⁰ Сизни къазанларыгъыз жаннган кёкенни жылыуун сезгинчи, жанмагъанын да, кюйген кесеуюн да бургъан жел чачарыкъды.

¹¹ Дерт жетдирилгенин кёрген заманында, тюзлюклю къууанырыкъды, кесини аякъларын аман адамны къанында жууарыкъды.

¹² Сора адам: «Кертиси бла да тюзлюклюге хайыр барды! Кертиси бла да жер башында хукму этиучю Аллах барды!» – деп айтырыкъды.