Забур 56 - Сыйлы Инжил бла Забур

¹ Хорну таматасына: «Жоюп къойма» атлы макъам бла айтылады. Дауут жазгъан зикирди, ол Шауулдан дорбуннга къачхан заманда жазылгъанды.

² Манга жазыкъсын, Аллах, манга жазыкъсын, нек десенг мени жаным Санга ышанады эмда палахла озгъунчу, мен Сени къанатларынгы тюбюнде бугъунурукъма.

³ Уллу Аллахдан, манга ахшылыкъ этиучю Аллахдан тилек этерикме.

⁴ Ол кёкледен болушлукъ иерикди эмда мени къутхарлыкъды, мени жутуп къояргъа излегенни уялтырыкъды. Аллах Кесини мархаматын эм Кесини хакъ кертисин иерикди.

⁵ Мени жаным асланланы арасындады. Мен, аланы тишлери – сюнгю эм садакъ окъ, аланы тиллери да – жютю къылыч болгъан, ауузларындан жаннган от чыкъгъан, адам улуланы арасында жатама.

⁶ Кёкледен да бийикге кётюрюл, Аллах, Сени махтауунг битеу жерни башы бла болсун!

⁷ Мени аякъларыма тузакъ хазырлагъан эдиле. Мени жаным мудах болгъан эди. Мени аллымда уру къазгъан эдиле, сора анга кеслери тюшдюле.

⁸ Мени жюрегим хазырды, Аллах, мени жюрегим хазырды; зикир айтырыкъма эмда махтау саллыкъма.

⁹ Мени махтауум, уян! Арфа да, саз да, уяныгъыз! Мен эртте турлукъма.

¹⁰ Раббий, Санга халкъланы арасында шукур этерикме, Санга миллетлени арасында махтау саллыкъма.

¹¹ Нек десенг Сени мархаматынг кёклеге дери, Сени хакъ кертинг да булутлагъа дери уллуду.

¹² Кёкледен да бийикге кётюрюл, Аллах, Сени махтауунг битеу жерни башы бла болсун!