Забур 55 - Сыйлы Инжил бла Забур

¹ Хорну таматасына: «Узакъда болгъанланы тауушсуз тургъан кёгюрчюню» атлы макъам бла айтылады. Дауутну Филистлиле Гатда тутхан заманда жазгъан зикириди.

² Манга жазыкъсын, Аллах! Нек десенг адам мени жутуп къояргъа излейди, хар кюнден чабыуул этип, мени таргъа къысады.

³ Мени душманларым хар кюнден мени жутуп къояргъа излейдиле. Манга къажау тургъанла кёпдюле, эй Уллу Аллах!

⁴ Мен къоркъууда болгъан заманымда, мен Санга ышанама.

⁵ Аллахха, мен Аны сёзюн махтагъан Аллахха ышанама, къоркъмайма, инсан манга не этерикди?

⁶ Хар кюнден мени сёзлерими терсине бурадыла. Мени юсюмден аланы битеу ойлашыулары аманлыкъгъады.

⁷ Жыйыладыла, бугъунадыла, мени жанымы алыргъа тап заман сакълап, ызымдан сынап къарайдыла.

⁸ Кеслерини аманлыкълары ючюн ала тийишлисин алмай къутулурламы? Чамланыуунгда тайдыр, Аллах, халкъланы.

⁹ Мени кёчгюнчю болуп айланыуларымы Сен тергегенсе; мени жилямукъларымы суулугъунга сал, ала Сени китабынгда тюйюлмюдюле?

¹⁰ Мен Сенден тилек этген заманда, мени душманларым артха къачарыкъдыла. Мен муну билеме, нек десенг Аллах мени жанлыды.

¹¹ Аллахха, мен Аны сёзюн махтагъан Раббийге, мен Аны сёзюн махтагъан

¹² Аллахха ышанама, къоркъмайма. Адам манга не этерикди?

¹³ Аллах, Санга этген нюзюрлерими толтурургъа борчлума, Санга шукур къурман этерикме.

¹⁴ Нек десенг Сен мени жанымы ёлюмден, аякъларымы да абыныудан къутхаргъанса. Мен Аллахны аллында сауланы жарыгъында жюрюрюкме.