Забур 54 - Сыйлы Инжил бла Забур

¹ Хорну таматасына: къыл къобузла бла. Дауутну юйретиу зикири.

² Аллах, мени дууама тынгыла эмда мени тилегимден букъма.

³ Манга эс бёл эмда мени тилегими къабыл эт, мен къайгъыларым себепли тынчлыкъсызма.

⁴ Эмда душманны ауазындан, огъурсуз адамны зулму этиуюнден ынчхайма; нек десенг ала манга аманлыкъ чыгъарадыла эмда ачыу бла манга душманлыкъ этедиле.

⁵ Мени жюрегим мени ичимде къалтырайды, башыма ёлюм къоркъуула тюшгендиле.

⁶ Мени къоркъуу бла титиреу басхандыла эмда мени уллу къайгъы алгъанды.

⁷ Сора мен: «Манга, кёгюрчюнню къанатларыча, къанатла ким берир эди? Мен учуп кетер эдим эмда тынчайыр эдим.

⁸ Узакъгъа узайыр эдим мен эмда къум тюзде къалыр эдим.

⁹ Борандан, уллу желден бугъар жериме ашыгъыр эдим», – дедим.

¹⁰ Аланы буз, Раббий, эмда аланы тиллерин бир-бирлеринден башха эт, нек десенг мен шахарда зулмулукъ эмда къаугъа кёреме.

¹¹ Кече да, кюн да ала аны къабыргъаларыны юсю бла тёгерекге айланадыла, аны ортасында аманлыкъ этиуле бла къыйынлыкъла жюрюйдюле.

¹² Аны ортасында жоюлуу барды, алдау бла хыйлачылыкъ аны орамларындан кетмейди.

¹³ Манга аман айтхан, душман тюйюлдю, – анга мен тёзер эдим. Манга кесин уллудан кёрген мени кёрюп болмагъаным тюйюлдю, – андан мен жашырыныр эдим.

¹⁴ Алай а сенсе, манга кесимден башха болмагъан, мени шуёхум эм жууугъум.

¹⁵ Биз татлы ушакъ этиучю эдик эмда жамауат бла бирге Аллахны юйюне барыучу эдик.

¹⁶ Алагъа ажал тийсин, ала саулай ахыратха тюшсюнле. Нек десенг аманлыкъ этиу аланы мекямларында аланы араларындады.

¹⁷ Мен а Аллахдан тилек этерикме, сора Раббий мени къутхарлыкъды.

¹⁸ Ингирде да, эрттенликде да, кюнортада да жалбарып эм къычырыкъ этип тилерикме, сора Ол мени ауазымы эшитирикди.

¹⁹ Манга къажау тургъанладан мени жанымы ырахатлыкъ бла къутхарлыкъды, нек десенг манга къажау болгъанла кёпдюле.

²⁰ Аллах тилегими къабыл этер, ёмюрден да Жашагъан аланы бойсундурур. Нек десенг алада тюрлениу жокъду, ала Аллахдан къоркъмайдыла.

²¹ Душманым аны бла жарашыулукъда болгъанлагъа чабыуул этгенди, кесини келишиуюн бузгъанды.

²² Аны ауузу сары жаудан да жумушакъды, аны жюрегинде уа душманлыкъ барды. Аны сёзлери зейтун жаудан да жумушакъдыла, алай болгъанлыкъгъа ала къынындан чыгъарылгъан къылычладыла.

²³ Сен къайгъыларынгы Раббийни боюнуна сал, сора Ол санга болушур. Ол бир заманда да тюзлюклюню тентиретирик тюйюлдю.

²⁴ Аллах, Сен аланы жоюлуу уругъа тюшюрлюксе. Къан ичиучюле бла хыйлачыла кеслерини ёмюрлерини жарымына дери да жашарыкъ тюйюлдюле. Мен а Санга ышанама.