Забур 53 - Сыйлы Инжил бла Забур

¹ Хорну таматасына: къыл къобузла бла. Дауутну юйретиу зикири.

² Зифлиле келип эмда Шауулгъа: «Дауут бизде бугъуп турады», – деп айтхан заманда жазылгъанды.

³ Аллах! Кеси атынг бла мени къутхар эмда Кеси кючюнг бла манга хукму эт.

⁴ Аллах! Мени тилегими эшит, мени ауузуму сёзлерине тынгыла.

⁵ Нек десенг тыш адамла манга къажау тургъандыла, зулмучула да мени жанымы излейдиле; ала кеслерини эслеринде Аллахны тутмайдыла.

⁶ Ма, Аллах мени болушлукъчумду, Раббий мени жаныма къарыу береди.

⁷ Ол мени душманларыма аманлыкълары ючюн дерт жетдирир; Сени кертичилигинг бла аланы къурутуп боша.

⁸ Мен Санга кёлюм бла къурман келтирликме, Сени атынга шукур этерикме, Раббий; нек десенг алай этиу ахшыды.

⁹ Нек десенг Сен мени битеу палахладан къутхаргъанса, мени кёзюм да мени душманларыма къоркъмай къарап тургъанды.