Забур 52 - Сыйлы Инжил бла Забур

¹ Хорну таматасына: духовой керекле бла. Дауутну юйретиу зикири.

² Акъылсыз адам кесини жюрегинде: «Аллах жокъду», – дегенди. Ала терсине айланнгандыла эмда жийиргенчли аманлыкъла этгендиле. Ахшылыкъ этген жокъду.

³ Ангылагъан, Аллахны излеген бармыды деп кёрюр ючюн, Аллах кёкледен адам улулагъа къарагъанды.

⁴ Бары да тайгъандыла, бирча жараусуз болуп къалгъандыла. Ахшылыкъ этген жокъду, жангыз биреу да жокъду.

⁵ Законсузлукъ этиучюле, ётмек ашагъанча, Мени халкъымы ашаучула эм Аллахдан тилек этмеучюле ангыларыкъ тюйюлмюдюле?

⁶ Къоркъуу болмагъан жерде, ала къоркъуугъа тюшгендиле, нек десенг санга къажау тургъанланы Аллах сюеклерин чачханды. Аллах аланы къабыл этмей къойгъаны себепли, сен аланы уялтханса.

⁷ Сиондан Израильге къутхарыу ким берликди? Аллах Кесини халкъын жесирликден къайтаргъан заманда, Якъуп сюйюнюрюкдю, Израиль къууанч этерикди.