Забур 51 - Сыйлы Инжил бла Забур

¹ Хорну таматасына: Дауутну юйретиу зикири.

² Идумеялы Доек келип эмда Шауулгъа тил этип, Дауут Абимелекни юйюне келгенди деп анга айтхандан сора жазылгъанды.

³ Аманлыкъ этиуюнг бла не махтанаса, кючлю адам? Аллахны ахшылыгъы хар заманда да мени блады.

⁴ Палах чыгъарыргъа ойлашады сени тилинг, ол жютю жюлгюч кибик аман ниетлиди!

⁵ Сен ахшылыкъ этиуден эсе бек аманлыкъ этиуню, керти айтхандан эсе бек ётюрюкню сюесе.

⁶ Сен хар тюрлю палахлы сёзлени, хыйлачы тилни сюесе.

⁷ Аны ючюн Аллах сени ахырынга дери жокъ этерикди, сени сермеп тутуп мекямынгдан чыгъарып атарыкъды, сени тамырынгы да сауланы жеринден къоратырыкъды.

⁸ Тюзлюклюле кёрлюкдюле эмда къоркъурукъдула; аны хыликкя этерикдиле эмда:

⁹ «Ма, аны таянчагъы Аллахда болмай, кесини кёп байлыгъына ышаннган, кесини аманлыкъ этиую бла кючлю болгъан адам!» – деп айтырыкъдыла.

¹⁰ Мен а Аллахны юйюнде хар заманда да жашиллей тургъан зейтун терек кибикме эмда ёмюрледен ёмюрлеге да Аллахны мархаматына ышанама.

¹¹ Сени этгенинг ючюн, Санга ёмюрге да шукур этип эмда Сени атынга ышанып турлукъма, нек десенг Сени сыйлыларынгы аллында ол ахшылыкълыды.