Забур 5 - Сыйлы Инжил бла Забур

¹ Хорну таматасына: духовой керекле бла. Дауутну зикири.

² Раббий, мени сёзлерими къабыл эт, мени сагъышларыма тюшюн.

³ Я мени Патчахым, я мени Аллахым! Мени къычырыкъ этген ауазыма тынгыла; нек десенг мен Сенден тилек тилейме.

⁴ Раббий! Мени ауазымы эртте эшит. Сени аллынга эртте турлукъма эм сакъларыкъма.

⁵ Нек десенг Сен аманлыкъны сюймеучю Аллахса, огъурсуз адам Сенде орналырыкъ тюйюлдю.

⁶ Махтанчакъла Сени кёзлеринги аллында турлукъ тюйюлдюле, законсузлукъ этгенлени барын да Сен кёрюп болмайса.

⁷ Сен жалгъан айтыучуланы жоярыкъса, къан ичиучюден бла хыйлачыдан Раббий жийиргенеди.

⁸ Мен а, Сени уллу ахшылыгъынгдан Сени юйюнге кирликме, Сенден къоркъуп, Сени сыйлы юйюнгде сежда этерикме.

⁹ Раббий! Мени душманларым ючюн, Сени тюзлюгюнг бла манга жол башчы бол; Сени жолунгу мени аллымда тюзет.

¹⁰ Нек десенг аланы ауузларында кертилик жокъду: аланы жюреклери палахды, аланы тамакълары ачыкъ къабырды, тиллери бла кёзбау этедиле.

¹¹ Аланы айыпларына тюбет, Аллах, ала кеслерини ниетлеринден жоюлсунла. Аланы кёп харамлыкъларыны себебинден, аланы къабыл этме; нек десенг ала санга къажау болуп къозгъалгъандыла.

¹² Сора битеу Санга ышаннганла къууанырыкъдыла, ёмюрледе къууанч зикир айтырыкъдыла, Сен да алагъа жакълыкъ этериксе эмда Сени атынгы сюйюучюле Сени бла махтанырыкъдыла.

¹³ Нек десенг Сен тюзлюклюге игилик этесе, Раббий; къоруулаучу сауут кийдиргенча, ыразылыгъынг бла, анга таж кийдиресе.