Забур 49 - Сыйлы Инжил бла Забур

Асафны зикири.

¹ Аллахланы Аллахы Раббий сёлешгенди эмда жерни кюн чыкъгъан жанындан кюн батхан жанына дери чакъырады.

² Тамам ариу Сиондан жарытып кёрюнеди Аллах.

³ Бизни Аллахыбыз келип къалады эмда тауушсуз тюйюл: Аны аллында жутуп къоюучу от, Аны тёгерегинде да кючлю жел.

⁴ Ол Кесини халкъына хукму этерге, огъартындан кёкню бла жерни чакъырады:

⁵ «Къурманны болушлугъу бла Мени бла кесаматха кирген Мени сыйлыларымы Манга жыйыгъыз».

⁶ Кёкле да Аны тюзлюгюн, Хукмучу Аллах кесиди деп билдиредиле.

⁷ «Эй халкъым, тынгыла, Мен сёлеширикме. Израиль, Мен санга къажау шагъатлыкъ этерикме; Мен Аллахма, Сени Аллахынгма.

⁸ Мени санга гурушха этеригим сени къурманларынг ючюн тюйюлдю; сени саулай кюйдюрген къурманларынг хар заманда да Мени аллымдадыла.

⁹ Сени юйюнгден тана, не сени ыстауатларынгдан текеле аллыкъ тюйюлме.

¹⁰ Нек десенг Меникиледиле агъачдагъы битеу жаныуарла да, минг тауладагъы малла да.

¹¹ Тауладагъы битеу къанатлыланы билеме, аулакъладагъы хайыуанла да Мени аллымдадыла.

¹² Мен ач болгъан болсам эди, санга айтмаз эдим, нек десенг Мениди битеу дуния да эм андагъы хар зат да.

¹³ Мен ёгюзлени этлерин ашаймамы эмда текелени къанларын ичемеми?

¹⁴ Аллахха къурманнга махтау келтир эмда Уллу Аллахха этген нюзюрлеринги толтур

¹⁵ Эмда къайгъылы кюнюнгде Мени чакъыр. Мен сени къутхарырма, сен да Манга махтау салырса».

¹⁶ Аман адамгъа уа Аллах былай айтады: «Мени акъыл юйретиуюмю кёрюп болмайса эмда Мени сёзлерими кесингден кери атаса.

¹⁷ Мени жорукъларымы юсюнден сёлеширге эмда Мени кесаматымы ауузунга алыргъа не эркинлигинг барды?

¹⁸ Гудучуну кёрген заманынгда аны бла келишесе, зийна этиучюле бла да тюбеше тураса.

¹⁹ Аман сёлеширге ауузунгу ачаса, сени тилинг да хыйлачылыкъланы тизип айтады.

²⁰ Олтураса да къарындашынга сёз этесе, анангы жашындан тил этесе.

²¹ Сен быланы этип тургъанса, Мен да тынгылап тургъанма, сен Мени да кесингча суннганса. Сени уялтырыкъма эмда гюняхларынгы кёзюнге кёргюзтюрлюкме.

²² Аллахны унутуучула, муну ангылагъыз, алайсыз Мен сизни пара-чара этерме, сиз да къутхарыучусуз къалырсыз.

²³ Къурманнга шукур келтирген адам, Манга хурмет этеди, кесини жолун сынап къарагъан адамгъа да, Мен Аллахны къутхарыуун кёргюзтюрме».