Забур 48 - Сыйлы Инжил бла Забур

¹ Хорну таматасына: Къорах улуланы зикири.

² Битеу халкъла мынга тынгылагъыз, битеу дунияда жашагъанла муну эшитигиз,

³ Бош адамла да, асылла да, жарлы бла бирча бай да.

⁴ Мени ауузум терен акъыллы сёзле айтырыкъды, мени жюрегими ойлашыулары да билим берликди.

⁵ Оюм берген таурухха къулагъымы саллыкъма, элберими саз бла ачарыкъма.

⁶ Мени жауларымы законсузлугъу мени тёгерегимден алгъан заманда, къыйынлыкъ кюнледе мен не ючюн къоркъурукъма?

⁷ Эй кеслерини къарыуларына ышаннганла эм кеслерини кёп байлыкълары бла махтаннганла!

⁸ Адам не этип да кесини къарындашын хакъ берип алаллыкъ тюйюлдю эмда аны ючюн Аллахха тёлеу бераллыкъ тюйюлдю.

⁹ Аланы жанларын тёлеу берип алыуну багъасы уллуду, ол ёмюрге да боллукъ зат тюйюлдю,

¹⁰ Адам ёмюрлюкге да жашап къалырча эм къабыр кёрмезча.

¹¹ Жахилле да, оюмсузла да жоюлгъанлары кибик, терен акъыллыла да ёлгенлерин эмда кеслерини мюлклерин башхалагъа къойгъанларын хар ким да кёреди.

¹² Аланы ойлашыулары, аланы юйлери ёмюргедиле, аланы мекямлары да тукъумдан тукъумгъадыла деп алайды, кеслерини жерлерине да ала кеслерини атларын атайдыла.

¹³ Алай болгъанлыкъгъа адам хурметде болуп турлукъ тюйюлдю; ол, жоюла тургъан хайыуанлагъа ушарыкъды.

¹⁴ Аланы бу жоллары аланы акъылсызлыкъларыды, алай а аланы ызларындан баргъанла аланы айтханларын къабыл кёредиле.

¹⁵ Къойлача, ала ахыратха буюрулгъандыла, аланы ажал кютерикди, сора эрттенликге тюзлюклюле алагъа бийлик этерикдиле; аланы къарыулары тауусуллукъду, ахырат – аланы мекямларыды.

¹⁶ Мени уа Аллах къабыл этерикди, жанымы ахыратны эркинлигинден къутхарлыкъды.

¹⁷ Адам бай болуп баргъан заманда, аны юйюню махтауу кёп болуп баргъан заманда, къоркъма.

¹⁸ Нек десенг ёле туруп бир зат да аллыкъ тюйюлдю, аны махтауу аны ызындан барлыкъ тюйюлдю.

¹⁹ Ол сау заманында кесини жанына жарай эсе да эмда ол кесин зауукъ этдиргени ючюн аны махтай эселе да,

²⁰ Ол кесини аталарыны тукъумуна барлыкъды, ала бир заманда да жарыкъ кёрлюк тюйюлдюле.

²¹ Хурметде болуп, акъылы жетмеген адам, жоюла тургъан хайуанлагъа ушайды.