Забур 47 - Сыйлы Инжил бла Забур

¹ Къорах улуланы зикири, жыр.

² Бизни Аллахыбызны шахарында, Аны сыйлы тауунда Раббий уллуду эм бек махтаулуду.

³ Сион тау аламат бийикликди, битеу жерни къууанчыды; аны шимал жанында уллу Патчахны шахары барды.

⁴ Аны къалаларында Аллах жакъчыча белгилиди.

⁵ Нек десенг ма патчахла жыйылдыла эм бары да жанлап кетдиле.

⁶ Аны кёрюп сейирсиндиле, жунчудула эм къачып тебиредиле.

⁷ Аланы анда къоркъуу эм къатынланы къозлау къыйынлыкъларыча къыйынлыкъ алды.

⁸ Сен кюн чыкъгъан жанлы жел бла таршишли кемелени ууатаса.

⁹ Биз эшитгенибиз кибик, хар неге да кючю жетген Раббийни шахарында, бизни Аллахыбызны шахарында, алай кёрдюк; Аллах аны ёмюрлеге да кючлю этерикди.

¹⁰ Аллах, Сени мархаматынгы хакъындан Сени сыйлы юйюнгю ичинде биз ойлашхан эдик.

¹¹ Аллах, Сени атынг да, Сени махтауунг да жерни этеклерине жетеди. Сени онг къолунг тюзлюкден толуду.

¹² Раббий, Сени хукмуларынг ючюн Сион тау къууансын, Яхуданы къызлары сюйюнсюнле.

¹³ Сионну тёгерегине барыгъыз эмда аны тёгерегине айланып чыгъыгъыз, аны къалаларын санап чыгъыгъыз.

¹⁴ Жюрегигизни аны бегитилген жерлерине буругъуз, келлик тёлюге айтыр ючюн аны тоханаларына эслеп къарагъыз.

¹⁵ Нек десегиз ёмюрледен ёмюрлеге да бизни Аллахыбыз бу Аллахды, ёмюрге да Ол бизни башчыбыз болуп турлукъду.