Забур 45 - Сыйлы Инжил бла Забур

¹ Хорну таматасына: Къорах улуланы зикири; назик тиширыу ауазла бла айтылады. Жыр.

² Аллах бизге ышыкъды эм кючдю, палахлада женгил болушлукъчуду.

³ Ол себепден, жер окъуна титиресе да, таула да тенгизлени ортасына атылсала да, къоркъурукъ тюйюлбюз.

⁴ Аланы суулары таууш этсинле, кёмюкленсинле, аланы толкъунланыуларындан таула титиресинле.

⁵ Суу ырхыла Аллахны шахарын, Уллу Аллахны сыйлы мекямын къууандырадыла.

⁶ Аллах аны арасындады, ол теберик тюйюлдю. Аллах анга танг аласындан болушурукъду.

⁷ Миллетле къычырыкъ этгендиле, патчахлыкъла титирегендиле; Уллу Аллах Кесини ауазын эшитдиргенди, сора жер эрип къалгъанды.

⁸ Хар неге да кючю жетген Раббий бизни биргебизгеди, Якъупну Аллахы бизни жакъчыбызды.

⁹ Келигиз, Раббийни ишлерин кёрюгюз – Ол жер башында къаллай халекликле этгенди.

¹⁰ Жерни къыйырына дери урушланы тохтатады, садакъ жаяны ууатады, сюнгюню да сындырады, тачанкаланы отда кюйдюреди.

¹¹ «Тохташыгъыз эмда Аллах Мен болгъанымы билигиз. Миллетле арасында кётюрюллюкме, жер башында кётюрюллюкме».

¹² Хар неге да кючю жетген Раббий бизни биргебизгеди, Якъупну Аллахы бизни жакъчыбызды.