Забур 44 - Сыйлы Инжил бла Забур

¹ Хорну таматасына: «Лилияла» атлы макъам бла айтылады; Къорах улуланы юйретиу зикирлери. Сюймекликни жыры.

² Мени жюрегимден ахшы сёз тёгюлгенди; мен: «Мени жырым Патчахны юсюнденди», – дейме; мени тилим женгил жазыучуну къаламыды.

³ Сен адам улуладан аламатса; Сени ауузунгдан шафауат тёгюлгенди; ол себепден Аллах Санга ёмюрлеге да ыразы болгъанды.

⁴ Эй Кючлю, белинге къылычынгы къыс, махтауунг бла эм аламатлыгъынг бла айбатлан

⁵ Эмда хакъ кертинг, сабырлыгъынг эм тюзлюгюнг ючюн Сени бу аламатлыгъынг бла хорлаучуча тачанканга мин. Сени онг къолунг да Санга сейирлик ишле кёргюзтюр.

⁶ Сени окъларынг жютюдюле. Халкъла Сени аллынгда аууп къаллыкъдыла; окъларынг Патчахны душманларыны жюрегиндедиле.

⁷ Эй Аллах, Сени тахтанг ёмюрден ёмюргеди; Патчахлыгъынгы таягъы тюзлюк таягъыды.

⁸ Сен тюзлюкню сюйюп, законсузлукъну кёрюп болмагъанса. Ол себепден Аллах, Сени Аллахынг, къууанчны жауун Сени нёгерлерингден эсе Санга кёп жакъгъанды.

⁹ Сени битеу кийимлеринг мюр, сарысабур эм тарчын ийислидиле. Пил сюекден ишленнген тоханаладан къыл къобузла Сени жарытадыла.

¹⁰ Патчахланы къызлары Сени асыл тиширыуларынгы арасындадыла. Патчахны къатыны Офир алтын бла айбатланып Сени онг жанынгда тохтады.

¹¹ Эй къыз, эшит, къара, къулагъынгы сал, халкъынгы да атангы юйюн да унут.

¹² Патчах сени ариулугъунгу сюерикди, нек десенг Ол сени Бийингди, сен Анга сежда эт.

¹³ Тирни къызы да саугъала бла, халкъны бек байлары да сени бетинге жалынырыкъдыла.

¹⁴ Патчахны къызыны битеу аламатлыгъы ичиндеди, аны кийими алтын бла тигилгенди.

¹⁵ Ол оюу тигилген кийими бла Патчахха келтириледи, аны ызындан Санга аны тенг къызлары келтириледиле.

¹⁶ Жарыкълыкъ бла эм уллу къууанчлыкъ бла келтириледиле, Патчахны тоханасына киредиле.

¹⁷ Сени аталарынгы орунуна Сени уланларынг боллукъдула. Сен аланы битеу жерге бийле этип саллыкъса.

¹⁸ Сени атынгы тукъумдан тукъумгъа эсде турурча этерикме. Ол себепден Санга халкъла ёмюрледен ёмюрлеге махтау саллыкъдыла.