Забур 43 - Сыйлы Инжил бла Забур

¹ Хорну таматасына: Къорах улуланы юйретиу зикирлери.

² Аллах, биз кесибизни къулакъларыбыз бла эшитгенбиз, бизни аталарыбыз, аланы заманларында, буруннгу заманда Сен этген ишни хапарын бизге айтхандыла.

³ Сен Кесинги къолунг бла, миллетлени къыстап, аланы уа орнатханса; халкъланы къуууп кетерип, аланы уа жайгъанса.

⁴ Аталарыбыз жерни кеслерини къылычлары бла алмагъандыла эмда аланы, кеслерини билек кючлери къутхармагъанды, алай а Сени онг къолунг эм Сени билек кючюнг эмда Сени бетинги жарыгъы къутхаргъанды; нек десенг Сен аланы иги кёргенсе.

⁵ Мени Патчахым, Аллахым Сен ол Кесингсе; Якъупха къутхарыу бер.

⁶ Сени бла, душманларыбызны мюйюзле бла ургъанча урлукъбуз; бизге къажау тургъанланы Сени атынг бла аякъларыбыз бла малтарыкъбыз,

⁷ Нек десенг садакъ жаяма ышанмайма эмда мени къутхарлыкъ мени къылычым тюйюлдю;

⁸ Алай а бизни душманларыбыздан Сен къутхаргъанса бизни эмда бизни кёрюп болмагъанланы ыйлыкъдыргъанса.

⁹ Аллахны хакъындан хар кюнден махтанырыкъбыз эмда Сени атынга ёмюрге да шукур этип турлукъбуз.

¹⁰ Энди уа Сен бизни атып къойдунг эм бедишлик этдинг эмда бизни аскерлерибиз бла чыкъмайса;

¹¹ Бизни душмандан къачыртханса, бизни кёрюп болмагъанла да бизни тонайдыла.

¹² Сен бизни, къойланы бергенча, ашатыргъа бергенсе эмда бизни миллетлени арасында чачып къойгъанса;

¹³ Сен Кесинги халкъынгы хайырсыз сатханса эмда аны багъасын кётюрмегенсе;

¹⁴ Бизни къоншуларыбызгъа сёкдюрюрге, бизни тёгерегибизде жашагъанлагъа бизни хыликкя этерге эм сындырыргъа бергенсе.

¹⁵ Сен бизни башха миллетлени арасында таурухлукъ, халкъланы арасында баш силкиулюк этгенсе.

¹⁶ Аман айтыучуну бла тилчини ауазындан, душманны бла дертчини къарамларындан

¹⁷ Хар кюнден мени ыйлыгъыуум мени аллымдады, айып да мени бетими жабады.

¹⁸ Бу бары да бизни башыбызгъа келгенди, алай болгъанлыкъгъа биз Сени унутмагъанбыз эмда Сени кесаматынгы бузмагъанбыз.

¹⁹ Бизни жюрегибиз артха турмагъанды, бизни аякъларыбыз да Сени жолунгдан таймагъандыла.

²⁰ Алай а Сен бизни чакъанланы жеринде ууатханса эмда бизни ёлюм ауана бла жапханса.

²¹ Бизни Аллахыбызны атын биз унутхан болсакъ эди эм къолларыбызны башха аллахха узатхан болсакъ эди,

²² Сора муну Аллах тапмазмы эди? Нек десенг жюрекни тасхаларын Ол биледи.

²³ Алай болгъанлыкъгъа, Сени ючюн бизни хар кюн сайын ёлтюредиле, бизни союллукъ къойлагъа санайдыла.

²⁴ Тур! Нек жукълайса, Раббий? Уян, бизни ёмюрге атып къойма!

²⁵ Бетинги не ючюн жашыраса, бизни къайгъыбызны эм бизни унугъууубузну не ючюн унутуп къояса?

²⁶ Нек десенг бизни жаныбыз букъугъа батханды, бизни къарыныбыз топуракъгъа жабышханды.

²⁷ Сени мархаматынг ючюн бизге болушургъа тур эмда бизни къутхар.