Забур 41 - Сыйлы Инжил бла Забур

ЭКИНЧИ КИТАП

¹ Хорну таматасына: Къорах улуланы юйретиу зикирлери.

² Марал тау сууланы къалай кюсей эсе, мени жаным да, Аллах, Сени алай кюсейди!

³ Аллахха, жашау бериучю Аллахха, мени жаным термиледи: Аллахны аллына къачан барып кёрюнюрме?

⁴ Мени жилямукъларым манга кече да, кюн да ётмек орунуна болгъандыла; манга хар кюн сайын: «Сени Аллахынг къайдады?» – деп айтадыла.

⁵ Быланы эсиме тюшюрюп, ичимдегин тёгеме; нек десенг мен байрам этген кёп халкъны къууанч этген эм махтау салгъан ауазы бла кёп адам бла жюрюучю эм ала бла Аллахны юйюне кириучю эдим.

⁶ Жаным, сен мудах нек боласа эмда нек жунчуйса? Аллахха ышан, нек десенг мен энтда Анга махтау саллыкъма, мени Къутхарыучума эм мени Аллахыма.

⁷ Мени жаным мени ичимде мудах болады; ол себепден Иорданны жеринден, Хермон таудан, Мисар таудан мен Сени эсиме тюшюреме.

⁸ Сени суу секиртмелеринги ауазы бла тюпсюз тюпсюзню чакъырады. Сени битеу сууларынг эм Сени толкъунларынг мени юсюм бла ётгендиле.

⁹ Кюндюз Раббий Кесини мархаматын кёргюзтюр, кече да мени Анга зикирим, мени жашатыучу Аллахыма тилегим болур.

¹⁰ Мени къоруулаучу Аллахыма: «Сен мени унутуп нек къойдунг? Душманны унукъдурууундан мен нек тыхсып жюрюйме?» – деп айтырма.

¹¹ Сюеклерими сындыргъанча, мени душманларым мени масхара этедиле, хар кюн сайын манга: «Къайдады сени Аллахынг?» – дейдиле.

¹² Жаным, сен мудах нек боласа эмда нек жунчуйса? Аллахха ышан, нек десенг мен энтда Анга махтау саллыкъма, мени Къутхарыучума эм мени Аллахыма.