Забур 40 - Сыйлы Инжил бла Забур

¹ Хорну таматасына: Дауутну зикири.

² Жарлыны къайгъысын этген адам насыплыды! Къыйынлыкъ кюнде Раббий аны къутхарлыкъды.

³ Раббий аны къоруулар, аны сау жашатыр, жер башында ол насыплы болур. Сен аны душманларыны къолларына бермезсе.

⁴ Аны ауруп жатхан жеринде Раббий анга кюч берир. Аны ауругъанында Сен аны тёшегинде игиге айландырырса.

⁵ Мен: «Раббий! Манга жазыкъсын, мени жанымы сау эт; нек десенг мен Санга къажау гюнях этгенме», – дегенме.

⁶ Мени душманларым мени юсюмден аман айтадыла: «Ол ёлюп, аны аты къачан жокъ болур?» – дейдиле.

⁷ Мени кёрюрге келген адам да жалгъан айтады, аны жюреги ичинде ётюрюкню жыяды, сора ол, тышына чыгъып, хапар этеди.

⁸ Мени кёрюп болмагъанла бары да, кеси араларында манга къажау шыбырдайдыла, манга аман ниет этедиле:

⁹ «Аны башына аман ауруу келгенди; ол тёшекге тюшгенди, ол энди къобарыкъ тюйюлдю», – дейдиле.

¹⁰ Мени биргеме ётмек ашагъан, мен анга ышаннган, мени эм иги тенгим окъуна, манга табанын кётюрдю.

¹¹ Раббий, Сен а манга жазыкъсын, мени къобар, мен алагъа жетдирирме.

¹² Сен мени душманыма манга кёлюн кенгдиртмегенинг себепли, мени иги кёргенинги билеме.

¹³ Мени уа бузукъсузлугъум бла сакълайса эм ёмюрлеге да Кеси бетинги аллында саласа.

¹⁴ Израильни Раббий Аллахы, ёмюрден ёмюрге да алгъышлыды! Амин! Амин!