Забур 4 - Сыйлы Инжил бла Забур

¹ Хорну таматасына: къыл къобузла бла. Дауутну зикири.

² Мени ариулаучу Аллах, мен тилек этген заманда, мени тилегими къабыл эт! Такъырлыкъда Сен манга эркинлик бергенсе. Манга жазыкъсын эм мени тилегиме тынгыла.

³ Адамланы уланлары! Мени намысым къачаннга дери малтанып турлукъду? Бошну сюйюп эм ётюрюкню излеп, къачаннга дери турлукъсуз?

⁴ Раббий Кесине сыйлысын айыргъанын билигиз: мен Андан тилек этген заманда, Раббий къабыл этеди.

⁵ Ачыуланып, гюнях этмегиз, жатхан жеригизде жюреклеригизде ойлашыгъыз эм сабыр болугъуз.

⁶ Тюзлюкню къурманларын келтиригиз эм Раббийге ышаныгъыз.

⁷ Кёпле: «Бизге ахшылыкъ ким кёргюзтюр?» – дейдиле. Раббий, Сени бетинги жарыгъын бизге ачыкъ эт!

⁸ Сен мени жюрегими, аланы ётмеклери бла чагъырлары кёп болгъан заманда къууанчларындан да кёп къууанчдан толтургъанса.

⁹ Тынч жатама мен эм жукълайма, нек десенг Раббий, жангыз Сенсе мени къоркъуусузлукъда жашатхан.