Забур 39 - Сыйлы Инжил бла Забур

¹ Хорну таматасына: Дауутну зикири.

² Мен Раббийни болушлугъун тёзюм бла сакълагъанма, Ол манга эс бургъанды эмда мени къычырыгъымы эшитгенди.

³ Мени къоркъунчлу урудан, терен батмакъдан чыгъаргъанды, аякъларымы таш юсюне салгъанды, атламларымы къаты этгенди

⁴ Эмда мени ауузума жангы зикирни – бизни Аллахыбызгъа махтау зикирни – салгъанды. Кёпле кёрюп къоркъурла эмда Раббийге ышанырла.

⁵ Раббийге ышанып тургъан эмда ёхтемледен бла ётюрюкге тайгъанладан болушлукъ излемеген адам насыплыды.

⁶ Я Раббий Аллахым, Сен этген сейирлик ишле эм бизни ючюн этген муратларынг кёпдюле – Санга ушагъан жокъду! Мен аланы айтып билдирсем, ала санаудан озарла.

⁷ Къурманланы бла саугъаланы Сен унамай къойгъанса. Сен мени къулакъларымы ачханса, саулай кюйдюрюлген къурманланы бла гюнях ючюн кесилген къурманланы Сен дауламай къойгъанса.

⁸ Ол заманда мен: «Ма, келеме», – дегенме. Китап чулгъамда мени юсюмден жазылыпды:

⁹ Аллахым, Сени буйругъунгу толтурургъа кюсейме, Сени законунг да мени жюрегимдеди.

¹⁰ Мен Сени тюзлюгюнгю хайыр хапарын уллу жыйылыуда билдиргенме. Мен ауузуму тыймагъанма, Раббий, Сен билесе.

¹¹ Сени тюзлюгюнгю жюрегимде жашырып къоймагъанма, Сени ышаннгылылыгъынгы бла Сени къутхарыуунгу билдиргенме, уллу жыйылыуну аллында Сени мархаматынгы бла хакъ кертинги айтмай къоймагъанма.

¹² Раббий, ырахматынгы менден аяма; Сени мархаматынг бла хакъ кертинг мени хар заманда да сакъласынла.

¹³ Нек десенг санаусуз къыйынлыкъла мени тёгерегимден алгъандыла, мени законсузлукъларым манга жетгендиле, кёрюрге да болалмайма. Мени башымдагъы чачларымдан эсе ала кёпдюле, мен онгсуз болуп къалгъанма.

¹⁴ Раббий, мени къутхарыргъа иги кёр! Раббий, манга болушургъа ашыкъ!

¹⁵ Мени жанымы жоюлурун излегенле барысы да уялсынла эм бедишлик болсунла! Манга аманлыкъны сюйгенле артларына барсынла эмда хыликкялыкъгъа берилсинле!

¹⁶ Манга: «Аха! Аха!» – дегенле, кеслерини бедишлик болгъанларындан абызырасынла.

¹⁷ Сени излегенле бары да Санга сюйюнюшюп къууансынла, Сени къутхарыуунгу сюйгенле да тохтаусуз: «Раббийге уллу махтау болсун!» – деп турсунла.

¹⁸ Мен а жарлыма эм факъырма, алай болгъанлыкъгъа Раббий манга къайгъырады. Мени болушлугъум эм мени къутхарыучум Сенсе. Эй Аллахым, мычыма!