Забур 36 - Сыйлы Инжил бла Забур

Дауутну зикири.

¹ Аманлыкъчылагъа эришме, законсузлукъ этгенлеге сукъланма.

² Нек десенг ала къысха заманда кырдыкча чалынып ауарыкъдыла эмда кёгерген тирликлеча къурурукъдула.

³ Раббийге ышан эмда ахшылыкъ эт, жерде жаша эмда къоркъуусузлукъда бол.

⁴ Раббийден зауукъ эт, сора Ол санга жюрегинг излегенни берир.

⁵ Жолунгу Раббийге аманат эт эмда Анга ышан, сора Ол тамам этер

⁶ Эмда сени тюзлюгюнгю жарыкъча, сени ариуланыуунгу да кюнортача чыгъарыр.

⁷ Раббийге бойсун эмда Анга ышан. Кесини жолунда жетишимли болгъан, хыйлачылыкъ этиучю адамгъа эришме.

⁸ Ачыуланыуунгу тохтат, къутурууунгу да къой! Аманлыкъ этгенлеге эришме, аны ахыры аманлыкъ бла бошалыр.

⁹ Нек десенг аманлыкъ этиучюле жоюллукъдула, Раббийге ышаннганла уа жерге ие боллукъдула.

¹⁰ Энтда бир аздан аман адам къаллыкъ тюйюлдю, аны излесенг да тапмазса.

¹¹ Жууашла уа жерни иелери боллукъдула эмда ырахатлыкъны кёплюгюнден зауукъ этерикдиле.

¹² Тюзлюклюге къажау огъурсуз адам аман ниет этеди эмда анга тишлерин къыжылдатады.

¹³ Раббийни уа анга кёлю кюледи, нек десенг аны кюнюню келгенин кёреди.

¹⁴ Аман адамла, жарлыны бла факъырны агъызыр ючюн, тюз жол бла баргъанланы ёлтюрюр ючюн, къылычны къынындан чыгъарадыла эмда садакъ жаяларын тартадыла.

¹⁵ Аланы къылычлары аланы кеслерини жюреклерине кирликди, аланы садакъ жаялары да сындырыллыкъдыла.

¹⁶ Аман адамланы кёп байлыкъларындан эсе тюзлюклюню аз заты игиди.

¹⁷ Нек десенг аман адамланы билек кючлери сындырыллыкъдыла, тюзлюклюлени уа Раббий кючлендиреди.

¹⁸ Айыпсыз адамланы жашау кюнлерин Раббий биледи, аланы мюлк юлюшлери ёмюрге да турлукъду.

¹⁹ Палах заманда да ала айыплы боллукъ тюйюлдюле, ачлыкъ кюнледе да токъ боллукъдула.

²⁰ Аман адамла уа жоюллукъдула, Раббийни душманлары да думп боллукъдула, къозуланы ич жауларыча, тютюнде думп боллукъдула.

²¹ Аман адам ёнгкюч алады эмда къайтармайды, тюзлюклю уа мархамат этеди эмда береди.

²² Нек десенг Ол ыразылыкъ бергенле жерге ие боллукъдула, Ол налат бергенле уа жоюллукъдула.

²³ Адамны аякъларын Раббий тюз жюрютеди эмда Ол аны жолун иги кёреди.

²⁴ Ол жыгъылып тебиресе да, жыгъыллыкъ тюйюлдю, нек десенг Раббий аны къолундан тутуп турады.

²⁵ Мен жаш да болгъанма, къарт да болдум, сора тюзлюклюню къоюлуп, аны туудукъларын да ётмек тилеп кёрмегенме.

²⁶ Ол хар кюнден мархамат этеди эм ёнгкюч береди, аны туудукълары да алгъышлы боллукъдула.

²⁷ Аманлыкъдан тай эмда ахшылыкъ эт, сора ёмюрге да жашарыкъса.

²⁸ Нек десенг Раббий тюзлюкню сюеди эмда Кесини сыйлыларын атмайды. Ала ёмюрге да сакъланырыкъдыла, аман адамланы туудукълары уа жоюллукъдула.

²⁹ Тюзлюклюле жерге ие боллукъдула эмда анда ёмюрде да жашарыкъдыла.

³⁰ Тюзлюклюню ауузу терен акъыллы сёз айтады, аны тили да тюзлюкню айтып билдиреди.

³¹ Аны Аллахыны закону аны жюрегиндеди, аны аякълары таярыкъ тюйюлдюле.

³² Аман адам тюзлюклюню ызындан жашыртын къарайды эмда аны ёлтюрюрге излейди.

³³ Алай болгъанлыкъгъа, Раббий аны аман адамны къолуна берлик тюйюлдю эмда анга сюд этилген заманда, аны терслерге къоярыкъ тюйюлдю.

³⁴ Раббийге ышан эмда Аны жолун тут. Сен жерге ие болур ючюн, Ол сени кётюрюр, аман адамланы къурутулгъан заманларын да сен кёрюрсе.

³⁵ Тамырланнган кёп бутакълы терекча жайылгъан, залим, огъурсуз адамны кёрген эдим мен.

³⁶ Алай а ол озуп кетди, сора ма, ол жокъду; аны излегенме, алай а тапмагъанма.

³⁷ Айыпсыз адамны эсле, тюзлюклюге къара, нек десенг жарашыулукъну сюйюучю адамны жашауу келлик заманда боллукъду.

³⁸ Законсузла уа бары да къурутуллукъдула; аман адамланы келлик замандагъы жашаулары жоюллукъду.

³⁹ Тюзлюклюлеге къутхарылыу Раббийденди, къайгъы заманда аланы къалалары Олду.

⁴⁰ Раббий алагъа болушурукъду эм аланы къутхарлыкъды, аланы аман адамладан къутултурукъду эмда аланы азат этерикди; нек десенг ала Анга ышанадыла.