Забур 35 - Сыйлы Инжил бла Забур

¹ Хорну таматасына: Раббийни къулу Дауутну зикири.

² Законсузлукъ аман адамгъа аны жюрегинде айтады, аны кёзюню аллында Аллахдан къоркъуу жокъду.

³ Нек десенг ол кесин уллудан кёрюп, «Аллах мени гюняхымы тапмаз эм мени терслемез», – деп ойлайды.

⁴ Аны ауузуну сёзлери ётюрюкдюле эм хыйлалыкъдыла; ол акъыллы болургъа, ахшылыкъ этерге сюймейди.

⁵ Кесини тёшегинде законсузлукъну акъылына алады, огъурсуз жолгъа тюзеледи, аманлыкъдан жийиргенмейди.

⁶ Раббий! Сени мархаматынг кёклеге дериди, Сени хакъ кертинг булутлагъа дериди!

⁷ Сени тюзлюгюнг Аллахны таулары кибикдиле, Сени хукмуларынг да тюпсюз тенгиз кибикдиле! Раббий, Сен адамланы да, хайыуанланы да къоруулайса!

⁸ Аллах, Сени мархаматынг къалай багъалыды! Адам улула Сени къанатларынгы тюбюнде ырахатлыкъ табадыла,

⁹ Сени юйюнгю байлыгъындан токъ боладыла, Сени татлы сууларынгдан Сен алагъа ичиресе.

¹⁰ Нек десенг жашауну чыкъгъан жери Сендеди. Сени жарыгъынгда биз жарыкъ кёребиз.

¹¹ Сени билгенлеге Сени мархаматынгы, тюз жюреклилеге да Сени тюзлюгюнгю берип тур.

¹² Ёхтемни аягъы мени басмасын, аман адамны къолу да мени къыстамасын.

¹³ Ма, законсузлукъ этиучюле жыгъылгъандыла, тюбюне атылгъандыла эмда къобаргъа болалмайдыла!