Забур 33 - Сыйлы Инжил бла Забур

¹ Дауутну зикири; ол Абимелекни аллында кесин телича этип эмда андан къысталып кетген заманында жазылгъанды.

² Хар заманда да Раббийге шукур этерикме; мени ауузумдан Анга тохтаусуз махтау болсун.

³ Мени жаным Раббий бла махтанырыкъды, сабырла эшитирикдиле эмда къууанырыкъдыла.

⁴ Мени биргеме Раббийни уллулугъун билдиригиз эмда Аны атын бирге кётюрейик.

⁵ Мен Раббийден оноу излегенме, Ол мени тилегими къабыл этгенди эмда мени битеу къоркъууларымдан къутхаргъанды.

⁶ Кёзлерин Анга къаратхан адамла жарыкъланадыла, аланы бетлери да уялырыкъ тюйюлдю.

⁷ Бу факъыр тилек этгенди; Раббий, къабыл этип, аны битеу къыйынлыкъларындан къутхаргъанды.

⁸ Раббийден къоркъгъанланы тёгереклеринде Раббийни мёлеги къорууларгъа турады эмда аланы къутхарады.

⁹ Татыгъыз, Раббийни къалай ахшылыкълы болгъанын кёрюрсюз. Анга ышаннган адам насыплыды!

¹⁰ Раббийни сыйлылары, Андан къоркъугъуз, нек десегиз Андан къоркъгъанлада къолайсызлыкъ жокъду.

¹¹ Жаш асланла да инжиледиле эм ачлыкъ сынайдыла, Раббийни излегенле уа бир ахшылыкъдан да керекли болмайдыла.

¹² Келигиз, сабийле, манга тынгылагъыз: Раббийден къоркъургъа юйретейим сизни.

¹³ Адам жашаргъа сюе эсе эмда, ахшылыкъ кёрюр ючюн, узакъ ёмюрлю болургъа сюе эсе:

¹⁴ Тилин аманлыкъдан тыйсын, ауузун фитна сёзледен тыйсын,

¹⁵ Аманлыкъдан тайсын эм ахшылыкъ этсин, жарашыулукъ излесин эм аны ючюн кюрешсин.

¹⁶ Раббийни кёзлери тюзлюклюлеге, Аны къулакълары да аланы тилеклерине айланыпдыла.

¹⁷ Аманлыкъ этгенлеге уа Раббийни бети къажауду, аланы эсге келтириуню жер башындан думп этеди.

¹⁸ Тюзлюклюле тилек этедиле, Раббий къабыл этеди эмда аланы битеу къайгъыларындан къутхарады.

¹⁹ Жюреклери сыннганлагъа Раббий жууукъду, мугур кёллюлени да къутхарады.

²⁰ Тюзлюклюню кёп къайгъысы болады, аланы барысындан да Раббий аны къутхарады.

²¹ Ол аны битеу сюеклерин сакълайды, аладан бири да сынарыкъ тюйюлдю.

²² Аман адамны огъурсузлугъу аны кесин ёлтюрлюкдю, тюзлюклюню кёрюп болмагъанла да жоюлургъа буюруллукъдула.

²³ Раббий Кесини къулларыны жанларын къутхарлыкъды, Анга ышаннганладан бир киши да жоюлургъа буюруллукъ тюйюлдю.