Забур 32 - Сыйлы Инжил бла Забур

¹ Тюзлюклюле, Раббийни хакъындан къууаныгъыз: Аллахха махтау салыу дурус адамлагъа ушагъыулуду.

² Раббийге сазла бла махтау салыгъыз, он къыллы къобуз бла Анга зикир айтыгъыз.

³ Анга жангы зикир айтыгъыз, Анга ариу низам бла, къууанып къычыргъан ауаз бла зикир айтыгъыз.

⁴ Нек десегиз Раббийни сёзю тюздю, Аны битеу ишлери да ышаннгылыдыла.

⁵ Ол тюзлюкню, тюз хукмуну сюеди; Раббийни мархаматындан жерни юсю толуду.

⁶ Кёкле Раббийни сёзю бла, кёкледе жарыкъ бериучюлени бары да Аны ауузуну солууу бла жаратылгъандыла.

⁷ Тенгизни сууларын къалаула кибик жыйгъанды, тюпсюзлени асыралыучу жерледе салгъанды.

⁸ Битеу жер Раббийден къоркъсун; дунияда жашагъанла барысы да Аны аллында титиресинле.

⁹ Нек десегиз Ол айтханлай, хар зат болуп къалгъанды. Ол буюргъанлай, хар зат кёрюнюп къалгъанды.

¹⁰ Раббий миллетлени оноуларын бузады, халкъланы муратларын жокъ этеди.

¹¹ Раббийни оноуу уа ёмюрге да турады, Аны жюрегини муратлары тукъумдан тукъумгъадыла.

¹² Раббий аны Аллахы болгъан миллет – Ол аны Кесине юлюшге сайлагъан халкъ – насыплыды.

¹³ Раббий кёкледен къарайды, битеу адам улуланы кёреди.

¹⁴ Олтургъан тахтасындан Ол битеу жер башында жашагъанлагъа къарайды.

¹⁵ Аланы барысыны да жюреклерин Ол жаратханды эмда аланы битеу ишлерине тюшюнеди.

¹⁶ Патчах аскерини кёплюгю бла къутуллукъ тюйюлдю, пелиуанны уллу къарыуу аны къорууларыкъ тюйюлдю.

¹⁷ Ат къутхарыр деп ышаныу бошду, ол кесини уллу къарыуу бла къутхараллыкъ тюйюлдю.

¹⁸ Ма, Раббийни кёзю Андан къоркъгъанладады эм Аны ахшылыгъына ышаннганладады,

¹⁹ Ол аланы жанларын ёлюмден къутхарлыгъына, ачлыкъ заманда да аланы жашатырыгъына ышаннганладады.

²⁰ Бизни жаныбыз Раббийге ышанады: бизни болушлугъубуз эм къоруулаучубуз Олду.

²¹ Аны хакъындан бизни жюрегибиз къууанады; нек десенг биз Аны сыйлы атына ышаннганбыз.

²² Раббий, биз Санга умут тутханыбыз кибик, бизге Сени ахшылыгъынг болсун.