Забур 30 - Сыйлы Инжил бла Забур

¹ Хорну таматасына: Дауутну зикири.

² Раббий, Санга ышанама, бир заманда да айыплы болмайым, Сени тюзлюгюнг бла мени къутхар;

³ Манга къулагъынгы сал, мени къутхарыргъа ашыкъ. Мени къутхарыр ючюн, мени кючлю къалам, кирир юйюм бол,

⁴ Нек десенг Сен мени къаямса эмда къаламса; Кесинги атынг ючюн мени жюрют эмда манга башчылыкъ эт.

⁵ Манга жашыртын салгъан тузакъларындан мени чыгъар; нек десенг мени кючюм Сенсе.

⁶ Мен жанымы Сени къолунга береме; хакъ керти Раббий Аллах, Сен мени къутхарып тургъанса.

⁷ Фана идоллагъа табыныучуланы кёрюп болмайма, алай а Раббийге ышанама.

⁸ Сени мархаматынгы юсюнден къууанырыкъма эм сюйюнюрюкме, нек десенг Сен мени къыйынлыгъыма къарагъанса, мени жанымы ачыуун билгенсе

⁹ Эмда мени душманны къолуна бермегенсе; мени аякъларымы эркин жерге салгъанса.

¹⁰ Манга жазыкъсын, Раббий, нек десенг мен такъырлыкъдама; мени кёзюм да, мени жаным да, мени ичим да ачыудан къуругъандыла.

¹¹ Мени жашауум мудахлыкъда, ёмюрюм да ахтыныулада ётюп кетеди; мени гюняхларымдан мени кючюм онгсуз болгъанды, мени сюеклерим да къуругъандыла.

¹² Битеу душманларымдан къоншуларымда окъуна бедишлик, танышларыма да къоркъутуучу болуп къалгъанма: мени орамда кёргенле менден къачадыла.

¹³ Мен ёлгенча, жюрекледе унутулгъанма; мен – сыннган сауут кибикме.

¹⁴ Нек десенг кёплени аман сёзлерин эшитеме; хар жерден да палах келеди, ала манга къажау бир тилли болгъан заманларында, мени жанымы чыгъарыргъа кенгеш этедиле.

¹⁵ Мен а, Раббий, Санга ышанама: «Мени Аллахым Сенсе», – дейме.

¹⁶ Мени кюнлерим Сени къолунгдадыла; душманларымы къолларындан эмда манга зулму этгенледен мени къутхар.

¹⁷ Бетинги Кеси къулунга жарыт, мархаматынг бла мени къутхар.

¹⁸ Раббий! Сенден тилек этгеним ючюн, айыплы болмайым; аман адамла уа айыплы болсунла, ахыратда тынып тохтасынла.

¹⁹ Ала тюзлюклюге къажау ёхтемлик бла эм сансыз этиу бла уятсыз сёлешген ётюрюкчю ауузланы тиллери тутулсун.

²⁰ Сени ахшылыкъларынг къалай кёпдюле! Быланы Сенден къоркъгъанлагъа сакълайса эмда адам улуланы аллында Санга ышаннганлагъа хазырлагъанса.

²¹ Адамланы къозгъалыуларындан Сен аланы бетинги жабыууну тюбюнде букъдураса, тиллени къаугъаларындан аланы чатырынгда жашыраса.

²² Аламат мархаматын манга бегиген шахарда кёргюзтгени ючюн, Раббийге шукур!

²³ Мен абызырауумда: «Сени кёз аллынгда къабыл этилмей къалгъанма», – деген эдим; алай болгъанлыкъгъа, мен болушлукъ излеп Санга къычырыкъ этген заманда Сен мени тилек этген ауазымы эшитгенсе.

²⁴ Битеу Аны сыйлылары, Раббийни сюйюгюз. Раббий тюз адамланы сакълайды, ёхтемлик этгенлеге да артыгъы бла тийишлисин береди.

²⁵ Битеу Раббийге ышаннганла, киши болугъуз, сизни жюрегигиз таукел этсин!