Забур 3 - Сыйлы Инжил бла Забур

¹ Дауутну зикири; ол кесини уланы Абшаломдан къачхан заманында жазылгъанды.

² Раббий! Мени душманларым къалай кёп болдула! Манга кёпле къажау турадыла.

³ Мени юсюмден кёпле: «Анга Аллахда къутхарылыу жокъду», – дейдиле,

⁴ Раббий, Сен а мени къоруулаучумса, мени махтауумса, мени башымы ёрге кётюртюучю Сенсе.

⁵ Ауазым бла къычырыкъ этип, Раббийден тилек этеме, Ол да мени тилегими Кесини сыйлы тауундан къабыл этеди.

⁶ Мен жатып жукълайма эм къобама, нек десенг Раббий мени къоруулайды.

⁷ Хар жанындан манга къажау тургъан ол къадар халкъдан къоркъурукъ тюйюлме.

⁸ Я Раббий, тур! Эй Аллахым, мени къутхар! Сен битеу мени душманларымы жаякъларына ураса, аман адамланы тишлерин сындыраса.

⁹ Къутхарыу Раббийденди. Сени ыразылыгъынг Сени халкъынгы юсюнде болсун!