Забур 29 - Сыйлы Инжил бла Забур

¹ Дауутну зикири; юйню жангыртхан заманда айтылгъан зикир.

² Раббий, Сен мени къобаргъанынг эм манга душманларымы кёллерин кенгдиртмегенинг ючюн, Санга уллу махтау саллыкъма.

³ Я Раббий Аллахым! Мен Сенден тилек этгенме, Сен да мени сау этгенсе.

⁴ Раббий! Сен мени жанымы ахыратдан къутхаргъанса эмда, мен кёрге кирмез ючюн, мени тирилтгенсе.

⁵ Раббийни сыйлылары, Анга зикир айтыгъыз, Аны сыйлы атына махтау салыгъыз;

⁶ Нек десегиз Аны чамланыуу бек къысха заманчыкъгъады, Аны иги кёрюую ёмюргеди. Ингирде жилямукъла агъадыла, эрттенликге уа къууанч келеди.

⁷ Мен зауукъ жашагъан заманымда: «Ёмюрде да тентирерик тюйюлме», – деген эдим.

⁸ Раббий, Сени ыразылыгъынг бла, Сен мени таууму кючлю этдинг; алай болсада Сен бетинги жашырдынг, сора мен абызырадым.

⁹ Раббий, ол заманда Сени чакъырдым мен эмда Раббийден жалбарып тиледим:

¹⁰ «Мен кёрге тюшсем, мени къанымдан не файда? Топуракъ Санга махтау саллыкъмыды? Сени хакъ кертинги билдирликмиди?

¹¹ Эшит, Раббий, эм манга жазыкъсын; Раббий! Манга болушлукъчу бол», – дедим.

¹² Сора Сен мени жарсыууму уллу къууанч этиуге айландырдынг, мени юсюмден зыбыр чепкен кийимни тешдирдинг эмда мени белиме къууанчлыкъны къысдырдынг.

¹³ Мени жаным Санга тохтаусуз махтау салып турсун. Я Раббий Аллахым! Ёмюрге да Санга шукур этип турлукъма.