Забур 28 - Сыйлы Инжил бла Забур

Дауутну зикири.

¹ Аллахны уланлары, Раббийге тийишлисин беригиз. Раббийге махтау бла сый беригиз.

² Раббийге Аны атына тийишли махтау беригиз, Раббийге Аны аламат сыйлы юйюнде сеждагъа ийилигиз.

³ Раббийни ауазы сууланы башындады; махтаулу Аллах кёкню кюкюретгенди, Раббий кёп сууланы башындады.

⁴ Раббийни ауазы кючлюдю, Раббийни ауазы аламатды.

⁵ Раббийни ауазы кедр тереклени ууатып къояды; Раббий Ливан кедрлени ууатып къояды

⁶ Эмда аланы бугъа танача секиртип бардырады, Ливанны бла Сирионну да жаш кийик бугъача секиртип бардырады.

⁷ Раббийни ауазы шыбыла от чакъдырады.

⁸ Раббийни ауазы къум тюзню титиретеди, Раббий Къадеш къум тюзню титиретеди.

⁹ Раббийни ауазы маралланы къозлатады эмда агъачланы чапыракъларын агъызады; Аны сыйлы юйюнде, хар зат да Аны махтауун билдиреди.

¹⁰ Раббий суу къыяманы башында олтургъанды, Раббий ёмюрге да патчах болуп олтурлукъду.

¹¹ Раббий Кесини халкъына кюч берликди, Раббий Кесини халкъына ырахатлыкъ бла ыразылыкъ берликди.