Забур 27 - Сыйлы Инжил бла Забур

Дауутну зикири.

¹ Раббий, Сенден тилек этеме, мени къаям! Манга жууапсыз болма, алайсыз, Сен жууап этмесенг, мен къабыргъа тюшгенлеча болуп къаллыкъма.

² Мен болушлукъ излеп Санга къычырыкъ этген заманда, къолларымы Сени сыйлы юйюнге кётюрген заманымда, мени жалбарыуларымы ауазына тынгыла.

³ Ала кеслерини жууукълары бла жарашыулукъну юсюнден айтхан, аланы жюреклеринде уа аманлыкъ болгъан огъурсуз адамла бла эм законсузлукъ этиучюле бла мени жойма.

⁴ Аланы ишлерине кёре, аланы аман иш этгенлерине кёре, алагъа жетишдир, аланы къолларыны ишлерине кёре, алагъа жетишдир, алагъа тийишлисин бер.

⁵ Ала Раббийни этгенлерине эм Аны къолларыны ишине эс бурмагъанлары ючюн, Ол аланы бузарыкъды эм къурарыкъ тюйюлдю.

⁶ Раббий алгъышлыды, Ол мени жалбарыуларымы ауазына тынгылагъанды.

⁷ Мени кючюм эмда къоруулаучум Раббийди; Мени жюрегим Анга ышанып тургъанды, Ол манга болушханды, мени жюрегим къууаннганды. Мен Анга зикирим бла махтау саллыкъма.

⁸ Раббий Кесини халкъыны кючюдю эмда Кеси майлагъаныны къутхаргъан къоруулаучусуду.

⁹ Халкъынгы къутхар эмда журтунга берекет бер, ёмюрлеге да аланы кют эмда кётюр!